Author: Karen de Lange (Page 29 of 33)

Met hierdie week se dagstukkies leer ons om aan God gehoorsaam te wees en ʼn verskil te maak.

Skrifgedeelte: Matteus 28:16-20                                Teks wat tref:  Matt 28:19

Ons vier vandag Christus se hemelvaart. Ons heg gewoonlik baie waarde aan ‘n persoon se laaste woorde op aarde.  Daar word dikwels na Matt 28 verwys as die “Groot Opdrag” van ons Here Jesus Christus en dan ‘n beroep gedoen om by sendingwerk betrokke te wees.. 

Jesus het kort tevore uit die dood opgestaan en wanneer Hy sy dissipels beveel om Hom weer by die berg te ontmoet, verwag die verslae dissipels weer iets groots. Hy was dood. Nou staan Hy in hulle midde. Jesus se verskyning laat hulle Hom dadelik aanbid.  Sekerlik wou hulle Hom nooit weer laat gaan nie.

Jesus se woorde bring vir hulle sekerheid en troos:  “Aan My is alle mag gegee in die hemel en op aarde.”  Om met so iemand bevriend te wees, kan beslis net goeie voordele en sukses beteken.  Hulle sou nooit weer toelaat dat Hy ver van hulle moet wees nie. 

En tog stuur Jesus hulle weg met sy eerste woorde: – “Gaan” –  Maar ons lees in vers 18 dat Jesus eers nader aan sy dissipels gekom het. Daarmee openbaar Hy sy deernis vir en betrokkenheid vir die mens in nood.  Onthou, hulle was verslae en verlore na sy dood.  Jesus beklemtoon eers sy posisie. Hy het die dood oorwin.  Hy beskik oor alle mag. Hierdie waarheid motiveer ons verdere optrede. Ons kan mos nooit stil bly of stil staan oor hierdie heerlike boodskap nie.  Ons kan nie anders as om te gaan nie. Dit is die wese van dissipelskap.  Om dissipel te wees beteken nie net om Jesus te volg nie, maar om ook oral en altyd besig wees om te gaan.  Dit is om met jou optrede die hart van die Evangelie te leef. Om Christus te dien en te volg is dinamies.

Die werkwoord gaan waarmee Jesus die dissipels uitstuur is nooit verlede tyd nie.  Om die lewende Christus te dien is nie ‘n middelmatige saak nie.  Soos ‘n avonturier elke keer ‘n nuwe uitdaging aanvaar en opgewonde voorberei en nie kan wag om hoër hoogtes te verken nie, moet ek bereid wees om te gaan!

Dit was nooit Jesus se bedoeling om in Matt 28 akademiese en teologiese gesprek oor doop, bekering en leer te begin nie.  Sy opdrag was eenvoudig net: – “gaan”.  Die inhoud van die boodskap wat die dissipels moet gaan uitdra is die enigste rede vir die opdrag: –  Jesus het alle mag!  Jesus is elke dag by ons!

Hieroor durf niemand swyg nie. Gaan en maak ʼn verskil!

Dors vir meer:

Lk 10:1-11

Gebed

Here, dankie dat ons nooit alleen is nie. Dankie dat U die pad vir ons voorberei het sodat ons met sekerheid daarop mag wandel.  Amen

Ds Petrus van Blerk

GK Rietvallei

0824560235

Met hierdie week se dagstukkies leer ons om aan God gehoorsaam te wees en ʼn verskil te maak.

Skrifgedeelte:  Jh 6: 1-15             Teks wat tref: Jh 6:9

Dit kan maklik gebeur dat ons soms so vasgevang raak met die dinge waarmee ons besig is, dat daar maklik iets agterweë bly.  In hoofstuk 5 vertel Johannes van die talle wondertekens wat Jesus gedoen het. Dit het tot gevolg dat ʼn groot skare mense agter Hom aangekom het om nog meer te sien. 

Alhoewel Jesus uitgeput moes gewees het na al die wondertekens en die skares wat net nog meer wil hê, is dit juis Hy wat besef dat iemand hulle van ‘n maaltyd moes voorsien.  In die daaropvolgende gebeure leer Jesus ons om dit wat tot ons beskikking is te gebruik.  Hy sal voorsien en wonders laat plaasvind. 

Ons is so gewoond om te fokus op die dinge wat ons nie het nie, dat ons gou vergeet van die baie wat ons wel uit die hand van die Here ontvang het. Filippus is dadelik gereed met verskonings en menslike berekeninge.  Volgens hom is dit ‘nie moontlik om soveel kos te koop nie. Twee honderd mense se dagloon sou nie eens genoeg wees nie.  Andreas maak boonop ook nog die opmerking dat dit ʼn hopelose situasie.  Al het Jesus soveel wonders in hulle teenwoordigheid gedoen, het hul steeds nie in Hom geglo en op Hom vertrou nie. 

Hierna leer Jesus die dissipels om te gebruik wat jy het. Met dit wat die seuntjie beskikbaar gehad het, sal Jesus nou voorsien.  Jesus neem beheer oor. Hy gee opdrag dat die mense moet gaan sit. Die mans alleen was omtrent vyf duisend. Met die vyf brode en die twee visse van die seuntjie word almal gevoed. Volgens Joodse gebruik word die kos wat oor is bymekaar gemaak. Daar is meer oor as waarmee aanvanklik begin is. 

Jesus wil die dissipels nog meer leer. Voordat die wonder plaasvind, het Hy God daarvoor gedank – God is die Gewer van alles wat ek het.  Vir hulle is Hy die Profeet wat na die wêreld moes kom. Hulle wou Hom dadelik koning maak want Hy sou in elke moontlike behoefte kon voorsien. Hulle begryp nie dat Hy gekom het om sy Vader se opdragte uit te voer nie.  Daarom gaan Jesus die berg op. Hy alleen, om later na nog ʼn wonder waar Hy op die see loop, vir hulle te wys dat Hy gekom het om die ewige lewe te gee.

Dors vir meer:

1 Kon 17:1-16

Gebed

Here, baie dankie dat U in my daaglikse behoeftes voorsien.  Dankie vir elke gawe wat ek uit U hand ontvang. Leer my om raak te sien dat alles vir U moontlik is en dat ek volkome op U kan vertrou. Maak my diensbaar in U Koninkryk. Amen

Ds Petrus van Blerk

GK Rietvallei

0824560235

Met hierdie week se dagstukkies leer ons om aan God gehoorsaam te wees en ʼn verskil te maak.

Skrifgedeelte:  Ester 4:1-17             Teks wat tref: Ester 4:14

Wie weet wat die dag van more vir ons inhou?  Skaars twee maande gelede sou ek bevorder word tot ʼn hoër posvlak.  Moontlik verhuis het. Lid word van die eerste span by my skool. In die huwelik tree. Met vakansie vertrek…………………..Totdat alles drasties en ingrypend verander. 

Koning Ahasveros geniet ongekende mag en rykdom.  Hy spog 180 dae lank met al die prag en praal van sy koninkryk en onthaal almal ʼn week lank in sy paleistuin.  (Ester 1:4,5) Ten spyte hiervan weier koningin Vasti, wat beeldskoon was, dat hy haar aan almal vertoon. In sy woede word sy vervang met ʼn ander ewe mooi meisie.  Ester verskyn op die toneel en word deur God se beskikking koningin.

ʼn Posisie wat sy later gebruik om die ganse Joodse bevolking van daardie tyd te red.  As weeskind word sy onder die sorg van haar oom Mordegai geplaas. Hy waarsku die koning deur bemiddeling van Ester van ʼn sameswering om hom te vermoor. Tot dusver is beide Mordegai en Ester deur die Here in posisies geplaas sodat hulle later diensbaar kan wees.

Dan verskyn Haman op die toneel en word hy bevorder tot ʼn posisie oor al die koning se amptenare Hy maak onder valse voorwendsels ʼn voorstel om nog meer in die guns van die koning te kom.  Hiervolgens sou al die Jode doodgemaak word.  Ook Ester, want sy was uit die geslag van die ballinge (Jode) wat deur Nebukadneser weggevoer is. 

Te midde hiervan pleit Mordegai by Ester om die koning te versoek om die Jode te spaar.  “Wie weet, miskien is dit juis met die oog op ʼn tyd soos hierdie dat jy koningin geword het!” Ester sou baie moes waag maar word deur God in ʼn posisie geplaas om die Jode te red. 

Sy raak ook bewus van ʼn verdere posisie waarin die Here ons deur Christus se genade plaas.  Ons het die voorreg om te bid.  Die koning gee gehoor aan Ester se versoek en die volk word nie uitgemoor nie.

Dit is deur God beskik dat jy in die posisie is waar jy jou nou bevind. Gebruik dit om ʼn verskil te maak!

Dors vir meer:
Jona 1:1-17

Gebed
Here, baie dankie vir alles wat ek van U ontvang.  Help my om te begryp waarom ek op hierdie oomblik en in hierdie omstandighede op die plek en posisie is waar ek my nou bevind.  Gebruik my in u diens.  Amen

Petrus van Blerk
0824560235

Met hierdie week se dagstukkies leer ons om aan God gehoorsaam te wees en ʼn verskil te maak.

Skrifgedeelte: 1 Sam 25:1-10 en 23-29 Teks wat tref: 1 Sam 25: 26

Terwyl Dawid vir Saul vlug ervaar hy hulp maar ook teenstand van mense. In Karmel ontmoet hy vir Nabal en Abigajil en leer ‘n baie groot lewensles. Nabal, die onbeskofte korrelkop weier om kos te voorsien ten spyte daarvan dat hy die guns en beskerming van Dawid geniet. Deur die bemiddeling van die beeldskone en wyse Abigajil weerhou God vir Dawid van kwaad.

Abigajil beteken – “my vader se vreugde”. In haar ontmoeting met Dawid wys sy waarom sy hierdie naam het:

Sy groet Dawid op ‘n eerbiedwaardige wyse. Sy openbaar insig in haar man se dwaasheid. Sy voorsien in die manskappe se behoefte vir voedsel. Sy weerhou Dawid daarvan om wraak te neem deur Nabal dood te maak en so God se gebooie te oortree.

So spreek God deur Abigajil om te verseker dat Sy raadsplan uitgevoer word. Abigajil ontvang skoonheid, wysheid en insig om ʼn verskil te maak sodat Dawid later as koning aangestel word om God se oorloë te voer en geen rampe hom van koers sal bring nie. (v28,29)

So gebruik God elke dag mense om sy plan uit te voer. As jy skoonheid, wysheid, insig en enige ander gawe ontvang, moet jy dit elke oomblik aanwend om God te verheerlik. Soms gaan dit vra dat jy ook teenoor mense wat naby jou is, moet optree. Abigajil se huwelik met Nabal kon haar seker van baie vreugde beroof. Met haar optrede leer ons dat ek altyd aan God gehoorsaam moet wees. Daar is daagliks mense soos Nabal op ons pad. Talle keer sal mense se reaksie en optrede ons ook teleurstel.

Juis dan moet ons leer dat dit belangriker is om God te verheerlik as om aan die grille en dwaasheid van mense gehoor te gee. Christus bly tot die dood aan sy Vader gehoorsaam en gee aan ons lewe tot in ewigheid.

Mag jou optrede en bemiddeling help dat ander raaksien hoe God jou regsaak behartig!

Dors vir meer:
Gen 12:1-9

Gebed
Here, leer my om gehoorsaam aan U te wees en ʼn verskil te maak met die gawes wat U aan my gee. Dankie dat U my gedagtes rig deur U Heilige Gees. Amen

Ds Petrus van Blerk
GK Rietvallei
0824560235

Jesaja 30:8-18

Teks wat tref:  Jesaja 30:15

So het die Here my God, die Heilige van Israel, gesê:

As julle julle bekeer en tot rus kom,

sal julle gered word.

Julle krag lê in stil wees en vertroue hê.

Vertrou op jouself en gaan ten gronde- Vertrou op God en leef!  Oor en oor bring Jesaja dieselfde boodskap.  Julle vertroue is nie op die Here nie.  Julle wil op ander lande vertrou.  Julle wil op vinnige perde vertrou en vinnig wegjaag as die moeilikheid te veel is. Julle vertrou op geweld en bedrog. Oor en oor bring Jesaja die boodskap want die Here se lankmoedigheid met sy volk is verstommend.  Hoekom sal die volk nie die Here vertrou?  Hoe blind is ons nie deur ons sondes en begeertes nie. (Sien ook Jesaja 29)

In hierdie gedeelte stuur die Here nogmaals vir Jesaja na Juda, nie net om die boodskap te preek nie, maar om dit op skrif te stel, dit sal altyd teen hulle getuig.  Hulle het die boodskap gehoor, daar is nie verskonings nie.  Duidelik maak die Here dit uit, die Heilige van Israel het hulle gewaarsku.   Gaan voort soos julle nou voortgaan en hierdie muur gaan inmekaar tuimel en julle vernietig, daar gaan niks van jul oor wees nie.

Maar weereens is die Here genadig.  Die Heilige van Israel se boodskap is: Kom tot rus, bekeer julle!  Julle krag lê in stil wees en vertroue hê.

Word stil voor God en voel veilig.  Is dit nie wat ons ook nou opnuut moet doen nie?  Ons moet stil word en tot rus kom.  Ja, bekeer en ons vertroue op God stel.

Dit is tipies van die mens om ongeduldig te word. Jy is nie bereid om te wag nie.  Hoe het ons gevoel nadat daar nog steeds nie oorgegaan is nie vlak 3 van Inperking nie?

Het ons verleer om stil te word voor die Here?  Kan ons nog op die Here wag?  Die grootste les wat die Inperking vir ons leer is dat ons nie die toekoms kan sien nie en dat ons kan breek met die wêreldse manier van dinge doen en leef.  Ons kan werlik tot stilstand kom en stil word voor God.

Stel opnuut jou vertroue op die Here, wag vir die Here om dinge in jou lewe reg te maak op sy tyd.  Hoekom? Omdat ons sekerheid van ons verlossing in Christus het, moet ons leer om stil te wees en om op God se tyd te wag.  Hy gee ons die ware rus deurdat ons volkome verlos is van al ons sonde.

Sy beloftes staan vas, Hy is gretig om ons genadig te wees en Hom oor ons te ontferm.  Ons krag is nie in self nie- maar dat ons op die Here kan wag.

Dors vir meer:

Psalm 27 (kyk vers 14 in verskillende vertalings) en Jesaja 40:26-31

Gebed

Here die Heilige. Dankie dat ons op U kan wag en stil word voor U.  Leer my om te onderskei die dinge wat ek vandag moet verander en kan verander en die dinge wat ek alleen in U hande kan plaas.  Laat U wil geskied. Amen.

Ds Danie Potgieter

072 272 9631

GK Rietvallei.

Jesaja 28:23-29

Teks wat tref:  Jesaja 28:29

Ook dit is iets wat van die Here die Almagtige af kom; kennis wat van Hom kom, is wonderbaar

en laat alles voorspoedig verloop.

Wysheid is iets wat ons almal nodig het. Veral in tye van swaarkry en beproewings en uitdagings het ons wysheid nodig. Wysheid is meer as om net antwoorde en oplossings te kry. Wysheid is om te weet hoe om hierdie inligting aan te wend – twee persone kan na dieselfde saak kyk en dieselfde data en inligting hê, maar beide gaan nie noodwendig die regte antwoord daaruit kry nie.

So kort ons wysheid vanaf die Here om ook na ons huidige omstandighede te kyk.

In hoofstuk 28 lees ons hoe die godsdiensleiers nie na Jesaja wou luister nie- hulle beleef sy uitsprake as brabbel taal.   Jesaja bring dan weer die boodskap van vernietiging oor die land.  Die volk en leiers wil hulle nie daaraan steur nie- ons het mos die Here aan ons kant, die doderyk sal ons nie kan raak nie.  Die Here gaan ʼn Rots neersit, ʼn Fondament, (vers 16) en slegs wie op God vertrou (deur die werk van Jesus Christus) sal gered word en hulle hoef nie te vrees nie.

Die volk wil nie nogtans nie luister na Jesaja nie.  Nou gebruik hy ʼn baie bekende beeld van ʼn boer wat weet wanneer om te plant en hoe om te oes. Waar kom hierdie kennis vandaan?

Die Here gee kennis en wysheid.  Hy bepaal die natuur en die skepping en die wette hoe om te bewerk en te vermeerder. So is alle kennis en wysheid vanaf die Here- die kennis om te werk en besighede te bestuur en om die ekonomie te versterk.

Maar net so is die belangrikste kennis wat ons nodig het ook vanaf die Here- die kennis oor die Here self.  Die kennis wat ons kry in sy Woord en wat dit werk deur Sy Gees.

God “boer” met wysheid in ons lewens.

Die Here voorsien nie net kennis nie, Hy is vir ons die beste voorbeeld van ʼn boer wat weet hoe om te plant en te oes en elke saad anders te dors.- Hy plant en bewerk elkeen van ons se lewens anders.

Party van ons moet hard getrap word op die dorsvloer soos Paulus wat geroep is op weg na Damaskus om die saad los te kry vanaf die kaf. In ander van ons se lewens is die Here besig om grond reg te maak om te plant.  Ander is weer in ʼn groeifase waar daar natgemaak word.  In ander is die Here besig om te oes en te dors.  So werk die Here verskillend in ons lewens soos wat ʼn boer verskillend werk met komyn en graan. 

Hy weet wat elkeen van ons nodig het en hoe lank dit nodig is.

Voor ʼn boer plant moet daar geploeg word- die grond moet oopgebreek word, maar ʼn boer sal nie vir altyd aanhou ploeg en ʼn oes verwag nie, daar moet ook geplant word.

So is die Here ook besig om in van ons se lewens grond oop te breek, om te dolwe- maar Hy sal ophou wanneer die grond reg is.  Moet daarom die werking van die Here nie teenstaan wanneer Hy met ons werk nie.

So werk die Here met die beste wysheid en kundigheid in elkeen van ons se lewens. 

As ons twyfel oor die swaarkry in ons lewens- die beproewings wat ons moet deurmaak.  Dink aan Christus wat gesterf het aan die kruis, sodat die oes groot kan wees,  dan sal daar vrede in ons hart kom.

Sien raak dat die Here met ons werk sodat Hy ons kan kom oes as koringkorrels van die skuur van die ewige lewe en nie as vuilgoed wat in die helse vuur gewerp gaan word nie.

Lewe met die wysheid van die Here, sien dit in alles raak.  Maar besef die grootste wysheid is dat Jesus Christus vir ons kom sterf het . Want Christus is die hoeksteen op wie ons lewens onwrikbaar vasstaan.  Wie op Hom vertrou hoef nie te vlug nie.

Dors vir meer:

Romeine 9:30-10:4 en 1 Korintiërs 15:35-58.

Gebed

Here dankie dat ons altyd op U kan vertrou.  Skenk ons die wysheid om vandag ook te beste te hanteer.  Dankie dat ons die wysheid van U Woord kan hoor en verstaan.  Werk met ons volgens U wil. Amen.

Ds Danie Potgieter

072 272 9631

GK Rietvallei.

Skriflesing: Jesaja 27
Vers wat Tref: 27:8
“Die Here het sy volk gestraf
deur hulle te verjaag en weg te dryf.
Met ‘n sterk wind het Hy hulle weggewaai ooste toe.”

Jy kan nie Jesaja lees sonder om onder die besef te kom nie dat dit God is wat die volk straf. Dit is Hy wat hulle verjaag en wegdryf deur ander volke te gebruik om hulle in ballingskap weg te voer en hulle stede te vernietig. Telkens deur die Ou Testament het die Here die volk gewaarsku om Sy bevele te gehoorsaam en nie weg te draai vanaf Hom en hul hulp by ander gode te soek nie. Reeds in Hoofstuk 1 was dit vir ons duidelik die oproep van die Here, nie ʼn wettiese nakom van godsdiens nie (die tempel en offers was besig) maar ʼn bekering van die hart, ʼn ingestelheid heeltemal gerig op die Here.
Is die Here vandag nog besig om ons te tug en te straf? Christus se verlossing het vir ons die volkome vergiffenis van ons sonde gebring. Die Heilige Gees het ons kinders van die Here gemaak (Romeine 8).
Is hierdie oproep vir ons dan nog steeds vandag? Leef ons nie onder die Evangelie nie?
Hebreërs 12 gee vir ons mooi die antwoord vir Jesaja 27 vir vandag.
Watter pa sal nie sy kind tug nie? Tugtiging is nooit lekker nie, self pynlik, nogtans lewer dit ʼn groot impak en vrug later in jou lewe.

In Jesaja lees ons op soveel plekke van die straf en vernietiging van die nasies. Die Here se straf oor hulle is met die uitsluitlike doel- hulle gaan vernietig word (sien ook Romeine 9:22).
Israel en die volke het gesondig deur hulle tot afgode te wend vir veiligheid en voorspoed. God straf en vernietig, maar in die geval van Israel bring Hy dit sodat daar nie net verset en vernietiging is nie, maar bekering en bevestiging. Daar moet terugkeer en berou plaasvind.

Sommige mense wil nooit ʼn gebeurtenis as straf en tugtiging vanaf die Here sien nie. Ja, elke droogte en pandemie en oorlog is nie altyd direkte straf vanaf die Here teenoor jou nie. Maar elke gebeurtenis, elke beproewing, gebruik die Here tot jou beswil en om jou nader aan Hom te bring.
Christus het aan die kruis vir ons God se toorn gedra en het ons bevry van die sonde. Maar God wil ons nog steeds as sy kinders dissiplineer.
Kan Hy net toesien hoe ons nogtans volhard in die sonde, nie volkome op Hom vertrou en ons redding op ander plekke soek nie? God se straf en tugtiging is nie vir ons ʼn betaling op ons sondes nie- dit alleen het Christus vir ons betaal- maar dit is die manier wat die Here die sonde in ons lewens ontbloot. Die Heilige Gees wys vir ons in tye van nood waar staan ons met ons verhouding met die Here en met ander.

Die Here se genade bly vir ons groot! As ons bekeer, ons vrede by die Here kom soek en met Hom vrede maak (vers 5) sal ons beleef hoe die Here ons weer laat groei in ons geloof.
Laat hierdie gebeurtenisse van die Covid-19 ons opnuut weer selfondersoek laat doen: Waar lê ons vertroue werklik? Watter deel van my lewe wil die Here nie vir my ontbloot sodat ek die afgodsaltare kan afbreek nie? Waar moet ek nog tot bekering kom en die ware aanbidding weer in my lewe herstel?

Bely opnuut weer jou sondes, keer terug na die Here! Lewe in Sy Lig!

Dors vir meer:
Psalm 94 en Hebreërs 12:4-12.

Gebed
Here my Here! Voed my en onderrig my in U Woord. Dankie vir die rus wat U vir my gee. Ek bely my sondeskuld voor U, lei my terug na U in alle dele van my lewe. Amen.

Ds Danie Potgieter
072 272 9631
GK Rietvallei.

Skriflesing: Jesaja 26
Vers wat Tref: 26:7
“Die pad van die regverdige is reguit,
U maak sy pad gelyk..”

Wie van ons wil nie ʼn reguit lewenspad hê nie? Ons hou daarvan om die gelyk paaie te neem, die snelweë wat ons vinnig by ons bestemming bring.
Wie van ons probeer nie om ons lewenspad reguit te laat verloop nie- nie net ons sin nie, maar veral die van ons kinders sin. Ons probeer die berge plat te maak, die bosse oop te kap, die slaggate te vul.
Maar slaag ons daarin? Kan ons werklik ons lewenspad reguit maak?

Ons slaag nie baie goed daarin nie. Vir ʼn tyd lyk dit of ons dit regkry- maar daar kom altyd weer berge en bosse en slaggate en selfs doodloopstrate. Wie van ons kan werklik voorberei het vir dit wat ons nou beleef met die inperking. Kan enige iemand met eerlikheid sê wat gaan ek doen oor 2 of 3 maande of volgende jaar? Die lewe is vol van hierdie hindernisse- wonde wat ons voel nie kan genees nie, geestelik en fisies. Vlekke wat nie wil uitwas nie, berge wat nie wil skuif nie. Daar is vir ons geen waarborg dat ons die lewenspad vir ons reguit kan maak nie. Die hoogste posisie, die grootste rykdom, die beste grade is geen waarborg van ʼn gelyke lewenspad nie.

Is als dan vir ons tevergeefs? Wat help dit dan dat ons swoeg en sweet en beplan? Die geheim van ʼn gelyke lewenspad lê nie by ons nie, maar by die Here.
Die pad van die regverdige is reguit, die Here maak dit gelyk. Hoe is ons dan regverdig? Uit eie vermoëns? Nee, die Here maak ons regverdig. Hy roep ons en gee dit vir ons geskenk. Hy het ons losgekoop deur die bloed van Christus. Hy is by ons en niks gebeur uit toeval nie.
Die regverdige se begeertes is nie aardsgerig nie, maar na bo. “ Ons wil u Naam eer en U aanroep.
In die nag smag ek na U, in die môre vra ek na u wil.”

Die regverdige besit die geheim van ʼn gelyke lewenspad. Christus het die die ongelyke, onregverdige pad gestap tot by Golgota sodat daar vir ons ʼn gelyke pad is na die Here. ʼn Pad wat ons moet vrymoedigheid kan betree en wat ons reguit neem na gelyktes wat ons nie eens kan besef nie.
Vandag weet ons, die Here werk met my in my lewenspad. God se vertroosting is groter as enige hartseer, angs of vrese. God is groter as enige berg of struikelblok of slaggat. God bevestig deur Sy Gees, daar is vir ons hoop, en vrede en vertroue. Daar is vir ons genade en vergiffenis.
Maak nie saak hoe ons verlede lyk nie, hoe onseker die toekoms is- saam met God het ons die allerbeste lewenspad. Ons beleef nou ontbering van die tentwoning, maar sien uit na die huis wat die Here vir ons gereed het.

Daarom kan ek vandag en elke dag sê: “Sy genade is vir my genoeg- meer as genoeg.”
My lewenspad is gelyk want ek wandel my lewenspad nie net in die lig van die Here nie, maar saam met die Here!
Daarom soek ek die eer van Sy Naam- in die aand begeer my siel die Here, in oggend soek ek na Sy wil!

Dors vir meer:
Psalm 27 en 2 Korintiërs 4:16-5:10.

Gebed
Here my Here! My siel, en hart begeer na U, ek wil leef in U wil alleen. Dankie dat U my op die allerbeste lewenspad neem, tot die verheerliking van U naam! Amen.

Ds Danie Potgieter
072 272 9631
GK Rietvallei.

Skriflesing: Jesaja 25
Vers wat Tref: 25:6
Op hierdie berg gaan die Here die Almagtige ‘n feesmaal gereed maak vir al die volke,
‘n feesmaal met die beste om te eet en te drink, goeie kos en geurige wyn.

Vanuit die oordeel-uitsprake in hoofstuk 13-24 kry ons opnuut weer die bevestiging, die groot troos, dit is die Here wat die gang van die geskiedenis bepaal.
Hierdie loflied in Hoofstuk 25 begin dan ook met hierdie belydenis: die Here voer alles uit soos wat Hy dit vooraf bepaal en bestem het. Weereens hoor ons hier dat geen nasie voor die Here kan standhou nie, almal moet voor Hom buig- daarom is die Here vir ons die toevlug in ons nood!

In Jesaja 25:6 staan dit uit dat die Here die Almagtige ’n feesmaal vir al die volke gereed gaan maak. Oorwinning in die Here sal gevier word. Die doek wat oor die aarde was oor al die nasies, sal verwyder word- die Here word geprys oor die hele aarde!
Die mag van die dood en die sonde sal gebreek word. God vee as Vader die trane af. Vir die oorblyfsel van Israel het dit werklikheid geword, want hulle is na Jerusalem teruggelei.
Nie net vir Israel nie, maar vir die hele wêreld, al die volke wat in Hom glo!
God het sy Seun, Jesus Christus, gestuur om redding te kom gee! Deur Jesus Christus verander alles vir die mens en die skepping. Jesus word gespot, gekruisig. Hy word deur God verlaat en Hy beleef die angste van die hel. Hy oorwin die dood, die sonde en Satan! Alles in die stad Jerusalem- Hier word die Here se mag bekend gemaak, in die hemel en op die aarde. Hy gee aan jou Sy genade.
Hy het die dood ewig vernietig, ons trane en smaad vir ewig verwyder!
Jesus kom weer, en dan sal ons die bruilofsfees van die Lam in sy volheid beleef. Dan sal God die
Vader ons trane finaal afvee. Dan is die seerkry van die sonde verby, finaal, vir altyd en altyd! (Op.
21:4)
Intussen? Jy is nie alleen nie. Die Heilige Gees is in jou en die Woord lei jou.
God skenk aan jou medegelowiges om saam die stryd te voer en nou reeds saam die oorwinningsfees te leef. Dit is waarom ons nagmaal vier.
Mag die Heilige Gees jou laat vashou aan die redding en vreugde wat Hy as God die Vader, Seun en Heilige Gees aan jou gee.
Deel jou vreugde van redding met dié wat nog soek en smag na God. Vertel vir almal (vers 9): Kyk daar, dit is ons God, ons het op Hom vertrou, Hy het ons gered.
Dit is die Here!

Dors vir meer:
Psalm 63 en Openbaring 21.

Gebed
Here, U is my God! U sal ek altyd prys en loof! Dankie vir U redding, liefde en hoop! Dankie vir U versorging elke dag en dat ek kan deel in die heerlikheid wat op my wag. Amen.

Ds Danie Potgieter
072 272 9631
GK Rietvallei.

Met hierdie week se dagstukkies leer ons hoe om ons vrese te oorkom  deur na God te luister, weerbaar te wees en voorbereid op te tree.

Skrifgedeelte: 2 Kron 13:1-15               Teks wat tref:  2 Kron 13:10

Die skrywer van Kronieke gee die volgende getuienis oor Abia: Hy  regeer drie jaar in Jerusalem. Na ʼn uiters suksesvolle oorlog teen Jerobeam neem sy mag toe. Hy het twintig seuns en sestien dogters.  Hy word in die familiegraf in die Dawidstad begrawe as ʼn laaste eerbetoon en as aanduiding dat hy reg voor die Here opgetree het.    

Abia beroep hom op die Here se belofte dat die koningskap vir altyd aan Dawid se nageslag gegee is.  Toe Jerobeam in opstand kom, weerstaan hy direk die koninklike mag van die Here.  Vol bravade durf Abia ʼn groot oormag aan en beroep hom op die Here met die geloofleuse in vers 10 –  “Ons dien die Here ons God; ons het Hom nie verlaat nie.”

Toe Jerobeam ʼn hinderlaag opstel en hulle van alle kante bedreig, ontstaan daar ʼn hewige geveg waar die Here vir Juda die oorwinning gee.  Omdat hulle op die Here vertrou beleef hulle dat hulle die Here self as leier by hulle het. 

Abia se sukses is nie sy eie nie maar die gevolg van ʼn lewe wat aan God toegewei is.  Hy sorg dat die diens van die Here onderhou word deur gereelde offers en rituele wat deur God beveel is. (v11). Hy het ʼn lewende verhouding met God en gee aan die Here die eer vir sy oorwinning.  Moontlik was hy ook beangs oor Jerobeam se groot weermag.  Deur geloof aangespoor, begin hy die geveg om God se eer!

Selfs as dit soms lyk dat gevare en die aanslae van die lewe my van alle kante bedreig; wanneer die eise van elke dag soms te veel word; en vir elke hinderlaag waarin ek mag kom, het die Here al klaar die oorwinning verseker.  In God se teenwoordigheid vlug enige oormag, hoe groot en sterk ook al.  Watter aanslag daar ook al op jou pad mag kom, hoef jy nooit te vrees nie. 

Aan die kruis het Christus elke hinderlaag wat ons mag bedreig afgeweer.  Maak Abia se woorde ook jou leuse en leef sonder vrees want ons het die Here self altyd by ons as Leier!

Sing: Ps 91:1 (Totius)

Dors vir meer:

Ps 91

Gebed

Dankie dat U ons van alle kante omring en ons altyd na veiligheid bring.  Leer ons om te vertrou en elke oomblik in U teenwoordigheid te leef.  Amen

Ds Petrus van Blerk

0824560235

GK Rietvallei