Author: Karen de Lange (Page 30 of 33)

Met hierdie week se dagstukkies leer ons hoe om ons vrese te oorkom  deur na God te luister, weerbaar te wees en voorbereid op te tree.

Skrifgedeelte: Matteus 16:13-23                        Fokusgedeelte: Matteus 16:18

Jesus se bediening bring toenemende konfrontasie. Nie net van sy aanvallers nie maar ook van die dissipels.  Hulle is in Sesarea-Filippi, waar baie afgode gedien is.  Jesus se naderende dood en sy posisie bring talle vrae.  Hy vra die dissipels wie Hy is en kry uiteenlopende antwoorde.  Sy vraag is belangrik om hulle vir die toekoms voor te berei

Dit het nou tyd geword dat Jesus seker maak dat almal beleef  hoe God in beheer van alles en  ook van sy kerk se geskiedenis is. Hy is die Christus – die een wat verlossing bring. Teenoor Hom is die Satan wat ons Here se kerk wil vernietig.   Te midde van hierdie stryd verseker Hy ons dat die magte van die hel die kerk nie sal oorweldig nie. Tog bly dit moeilik om hierdie trooswoorde te verstaan as ons daagliks aanslae beleef.  Wat gaan die uiteinde van die Corona virus wees?

Dit is die eerste keer dat die woord “kerk” in die Nuwe Testament gebruik word vir gelowiges. Die beeld van ʼn rots is reeds uit Psalm 18:2 bekend en dui op die fondament Christus,  waarop die kerk gebou word.  ʼn Rots het die betekenis van skuilplek en veilige vesting.  Hierby volg die verdere vertroosting dat die magte van die doderyk die kerk nie sal oorweldig nie. 

Hierna beskryf Jesus hoe geweldig groot die stryd tussen lig en donker sal wees as Hy selfs vir Petrus vermaan. Die beeld van die sleutels, as simbool van gesag en om mee te beheer,  maak dit duidelik dat ons eindbestemming ʼn saak van lewe en dood  vir die Here is.  Hy beheer alles.

Daagliks ervaar ons wat dit beteken dat die magte van die doderyk ons nie sal oorweldig nie. Ons word deur Christus, die Seun van die lewende God beskerm.

Dors vir meer:

Op 20:11-15

Gebed

Dankie Here dat ons in hierdie uitdagende tye kan weet dat U ons beskerm. Dankie dat U te midde van onsekerhede vir ons ʼn Rots is sodat ons stewig kan vastrap.  Amen

Ds Petrus van Blerk

0824560235

Met hierdie week se dagstukkies leer ons hoe om ons vrese te oorkom  deur na God te luister, weerbaar te wees en voorbereid op te tree.

Skrifgedeelte: Levitikus 6:8-13                            Teks wat tref: v 15

Die talle offers in die Ou Testament word alleen reg verstaan as ons God se bedoeling daarmee raaksien. Elke offer was ‘n gawe aan God uit dank vir alles wat van Hom ontvang is. Verder dien dit ook as uitdrukking van lof, ootmoed en berou. In Levitikus 6 word die betekenis van die brandoffer duidelik as dit die volk moes herinner dat:

• Hulle voortdurend en aanhoudend tot God moet bid
• Die vuur simbolies van God se teenwoordigheid, beskerming en bewaking is.
• Dit ‘n teken van absolute toewyding aan God was (die hele dier is verbrand in teenstelling met ander soorte offers waar net seker dele op die altaar gebring is)
• Hulle gesindheid teenoor die Here reg moet wees (uiterlik word dit bevestig deur die verskillende klere wat die priester moes aantrek)

Verder beveel die Here dat die vuur op die altaar nooit mag doodgaan nie.  Daarvoor moes die priester twee maal per dag nuwe hout opsit en die as verwyder  en op ‘n rein plek buite die kamp bring.  Baie klem word op die vuur geplaas.  Selfs as die priester buite die kamp was, moes hy verseker dat die vuur aanhou brand. Solank as die brandoffer in stand gehou was, het dit die volk aan God se teenwoordigheid herinner.

In my daaglikse geloofsbelewenis moet ek so optree dat die ywer vir God in my hart ‘n brandende vuur is. Op sigbare wyse moet ek my dienswerk aan die Here opdra en my offers betaal. Nooit mag ek verslap nie, maar met verantwoordelikheid moet die vuur aan die brand gehou word deur offervaardigheid. My geloofsbelewenis moet sigbaar wees!

Met Christus se opstanding het Hy verseker dat ons altyd in God se teenwoordigheid is. 

Dors vir meer:

1 Tes 5:16-22  (OAV)

Gebed

Baie dankie Here dat U Heilige Gees kragtig in ons werk. Leer ons om nooit met ons optrede die Gees uit te blus nie.  Amen

Ds Petrus van Blerk

0824560235

Met hierdie week se dagstukkies leer ons hoe om ons vrese te oorkom  deur na God te luister, weerbaar te wees en voorbereid op te tree.

Skrifgedeelte:   Jeremia 2:1-13  Teks wat tref:  v 13

Wat is die grootste bekommernis wat u beleef?  Dit wat dalk al jou energie tap of jou totaal moedeloos maak?  Die volk Israel ervaar dit ook – Gebarste waterbakke wat nie water hou nie.

Vir ‘n tweede maal gaan Jeremia die volk aanspreek . Eers beklemtoon hy die besondere verhouding waarbinne hulle met God staan. Daarna  word die pragtige digterlike taal onderbreek met ’n klagskrif in vers 4. Die bruid word gekonfronteer met ‘n  harde uitspraak.  Daar is huweliksontrou en die bruid verloor haar waardigheid. Sy het van die Here af weggedraai.

God formuleer ‘n klagskrif om hulle tot besinning te roep (vl3):  “My volk het twee sondes begaan: Hulle het My, die bron van lewende water, verlaat, en hulle het vir hulle waterbakke uit klip gekap, waterbakke wat gebars is en nie water hou nie”.   Die gevolge is rampspoedig. Hul dors word nie geles nie. Hulle swoeg tevergeefs.   Dit is so ingrypend dat selfs by die heidense volke so iets nog nooit voorgekom het nie.  Hulle kies gebarste waterbakke wat niks kan hou nie ten gunste van die Beloofde Land met volop strome, fonteine en putte. 

Kort voor lank het die water verdamp, deur die skeure in die rotse weggesypel,  troebel en modderig geword.  Daarteenoor is God die lewende waterbron wat versorg, voorsien, laaf, verkwik en reinig: (Jh 4:14,Op 21:6 )

Maar, dit is nie net Israel wat sy God verlaat het nie!   Dit is byna onmoontlik dat iemand die bron van lewende water vir ‘n gebarste waterbak sou verruil.  En tog is die optrede oral sigbaar.  Ons verruil die Here ook dikwels en soek ons eie heil.  Gewoonlik tot groot frustrasie en spanning.   Ons moet na die Here terugkeer.  Dit vra ‘n belydenis dat Christus en net Hy alleen versoening bring. Dit vereis ‘n ware skuldbelydenis.

Met sy bloed het Christus verseker dat ons nie weer sal dors kry nie. Daar is geen ander manier – net God is die Bron van die lewende water.

Kom bely jou sonde en drink van die lewende water wat God gee!

Dors vir meer:

Ps 36:9, Op 22:1,17

Gebed

Baie dankie Here dat U in ons behoeftes voorsien. Leer ons om nie in ons sonde te volhard nie.  Voed ons met strome lewende water.  Amen

Ds Petrus van Blerk

0824560235

Met hierdie week se dagstukkies leer ons hoe om ons vrese te oorkom  deur na God te luister, weerbaar te wees en voorbereid op te tree.

Skrifgedeelte: Numeri 13:1-32                            Teks wat tref: v 2,13

Ons het almal ‘n vrees vir iets in ons lewe soos klousterfobia (nou ruimtes), aragnafobia (spinnekoppe), hidrofobia (water) en sommer ‘n vrees vir die donker, ‘n plek of iemand. Die uitbreek van Covid 19 en die gepaardgaande sterftes, onsekerhede en die onbekende bring nog vrese.

Die volksleiers in Num 13 het weer ‘n vrees vir die grootte van hul vyande gehad.  Daarom rapporteer die meerderheid dat die inwoners van die Beloofde Land te sterk is om te oorwin.  Net twee van die verspieders sien kans om hulle te gaan aandurf.   Hoe is dit moontlik dat dieselfde groep wat die land verken het, twee uiteenlopende weergawes na Moses terugbring?

Ons dink ook maar aan ons eie optrede.   Mense beleef en ervaar gebeure verskillend.  Daar is optimiste, pessimiste en realiste.  Toe Moses opdrag gee dat die land verken moet word, was die volk heeltyd bewus van God se mag en teenwoordigheid.  Hy het die Egiptenare laat verdring in die Rooisee en die volk veilig daardeur gelei.  Hy het telkens aan hulle kos en water en redding gegee.

En ‘n oomblik later is die mense in Kanaän daarvoor verantwoordelik dat vrees hulle beetpak – v28:   “Maar die mense wat in die land woon is sterk en die stede is versterk en baie groot ”.  Skielik het die mense wat hulle sien “groter” as God geword.  Vrees lei daartoe dat die volk nie meer God se beloftes sien nie.  Hulle is bang vir hul vyand. 

Hoe gebeur dit dan daar  so ‘n groot meningsverskil tussen die verkenners ontstaan?  Die een groep vertrou op die Here terwyl die ander op eie insigte staatmaak.   Dit is die les wat Numeri 13 wil leer. 

Leer om deur God se oë na alles te kyk.  Gebruik God se beloftes om jou teen die vyand weerbaar te maak.  Kaleb se woorde in vers 30 spreek hiervan.

              “Ons moet beslis optrek en die land in besit neem, want ons kan dit doen.”

Sy optrede hierna bewys dat hy volkome vertrou het.  Hy sien dieselfde situasie as die ander, maar vanuit God se perspektief. 

Dink jy groot of klein van God?  Die volk het gevrees dat hulle sou misluk in hul optrede en wou daarom nie teen die vyand  optrek nie.  Hulle het hulself as sprinkane beskou.  Daarteenoor het Kaleb het die Here vir ‘n oorwinning vertrou.  Hy het nie die vyand gevrees nie.

Bring alles voor die Here en Hy sal jou onderneminge laat geluk (Spreuke 3:6)  Met Christus se kruisdood is elke vyand oorwin.    Hoe groot is God in jou lewe?

Dors vir meer:

Jes 41:13-16

Gebed

Here, baie dankie dat U in hierdie tyd van beproewing ons versorg en bewaar.  Neem die twyfel en vrees in ons harte weg. Leer my om seker en vasberade te leef.  Amen

Ds Petrus van Blerk

0824560235

Skriflesing: Hebreërs 11:1-22.
Vers wat Tref: 11:1 en 11:15-16.
“Om te glo is om seker te wees van die dinge wat ons hoop,
om oortuig te wees van die dinge wat ons nie sien nie.”

Waarvan kan jy vandag seker wees? Niemand kan met sekerheid sê hoe die toekoms gaan lyk nie, wat gaan volgende gebeur. Niemand weet hoe die Covid-19 gaan uitspeel nie, ook nie met die al die reëls van die inperking nie. Nie eens die regering is seker nie, weekliks word regulasies weer verander.

Met geloof het jy die sekerheid van die toekoms. J is seker van die dinge wat jy hoop. Geloof is vir jou die bewys van dit wat jy nog nie nou al kan sien nie.
Wat hoop jy, waarvan is jy seker? Die Here is in beheer en stap met jou ʼn pad. Maak nie saak die omstandighede nie, hoe deurmekaar en moeilik dit lyk nie. Die Here gebruik dit alles in Sy Raadsplan tot en met die wederkoms van Jesus Christus.

Die Hebreërs brief noem ʼn lys van geloofshelde- persone wat in hul geloof volhard het, sonder dat hulle die nabye toekoms kon gesien het, maar op die Here vertrou het.
Kyk na die voorbeeld van Abraham. Die Here roep hom en beloof aan hom en sy nageslag ʼn nuwe land- ʼn nageslag so groot soos die sterre aan die hemel. Abraham volg die Here in die geloof- hy weet nie hoe lyk die land nie, hy self het geen kind nie, maar in die geloof kan hy seker wees van God se beloftes. Nie omdat sy geloof so groot en sterk is nie, hy het baie maal ook getwyfel, maar omdat die Here so groot is.
Abraham se geloof was nie gefokus op die tydelike en die aardse nie- hy het maar in tente gewoon in die beloofde land. Maar hy het die toekoms gesien van ʼn stad wat die Here self bou en oprig. Hy het nie verlang na sy vaderland nie, maar na ʼn beter vaderland, die hemelse verlang.

Jy moenie net vaskyk teen die aardse om ons nie. Ja, in hierdie tyd en in Suid Afrika het die Here vir jou ʼn spesifieke opdrag en doel wat jy in geloof moet uitvoer. Jy verlang na nie ʼn lewe voor Covid-19 nie, maar verlang na die hemelse vaderland waarna jy met groot blydskap uitsien.
ʼn Vaderland waaraan jy deel het omdat jy deur Jesus Christus as kind van God gereken word. ʼn Verlange en sekerheid wat jy het omdat die Heilige Gees dit vir jou bevestig.

Daarom volhard in die geloof, gee nie jou geloofsvertroue prys nie. Hou by die riglyne wat die Here vir jou gee, maak nie saak hoe moeilik dit raak of al lyk dit of die wêreld op sy kop staan nie. Jy stem dalk nie saam met al die reëls en regulasies wat die regering instel nie, maar jy bly daarby (en skakel met die regering) omdat jy deur die ware geloof gehoorsaam is aan God

Mag jy opnuut deur die geloof die toekoms sien wat die Here vir vas en seker belowe. Jy het dit self makliker as die Abraham en die ander gelowiges in die Ou Testament, want aan jou is meer gegee oor die pad wat die Here beplan.
Volhard in die geloof!

Dors vir meer:
Heidelbergse Kategismus Sondag 7 en 2 Petrus 3.

Gebed
Ek loof en pry u Here! Lei my om te volhard in die geloof. Versterk my opnuut met U woord en met U Gees. Amen.

Ds Danie Potgieter
072 272 9631
GK Rietvallei.

Skriflesing: Jesaja 8:5-22

Vers wat Tref: 8:13.

Koning Agas en die volk het nie na die Here gesoek nie.  Hulle stel hulle vertroue op ander volke en raadpleeg mediums, probeer die dooies oproep.  Hulle vrees nie die Here nie en raadpleeg nie die wet en getuienis van die Here nie.  Dit wat duidelik gegee is, bly hulle weg van en vertrou op die onsekere. 

Omdat die volk die kalm water van Siloag (die fontein wat water aan Jerusalem verskaf het) verwerp het, gaan hulle die vloedwater van die Here se oordeel beleef.  Die oordeel wat die Here stuur eindig dan in vers 10 met die getuienis “Immanuel-God is by ons”.  God is by die volk ook in sy oordeel.

Jesaja bring nog ʼn boodskap, hierdie keer aan die wat wel op die Here vertrou. Hulle hoef nie in paniek te lewe nie- hulle moet wag en hoop op die Here.  In Jesaja se omstandighede bly hierdie ʼn moeilike pad om te stap – die res van die volk vrees nie die Here nie- die vernietiging gaan kom. 

In die krisissituasie is die Here die lewensdraad waaraan jy moet vashou.  Jesaja en sy volgelinge kan nog steeds leef in die verwagting dat die Here ‘n uitweg, ‘n nuwe en ander deur sal voorsien. Te midde van die rokende stomp van die buurlande se vuur, en die vloedwaters wat tot aan die nek raak, van die Assiriese leërmag, van elke eeu, die gejaag na besittings, en die verwarring oor wie god is, is die draadjie van hoop in wie God is.

Hoe moet hulle die Here aanroep?  Julle moet die Here die Almagtige eer as die Heilige.  Vir Hom moet julle vrees en vir Hom moet julle bang wees.  Vir die wat op die Here vertrou is Hy die veilige beskutting, maar vir die ander is Hy ʼn klip waarteen jy stamp, ʼn rots waaroor jy struikel, verpletter word.

Die Here verberg Hom vir die nageslag van Jakob (vers 17), maar nogtans kan Jesaja op die Here bly hoop en vertrou.  Die Here gebruik hom en sy gesin as lewende getuies van die Here die Almagtige!  Hy bly by die wet en die getuienis van die Here, daarom het hy ʼn toekoms.

Het jy nog ʼn toekoms?  Wie se voorbeeld volg jy na?  Roep die Here aan as die Almagtige, die Heilige!  Soek sy wet en getuienis wat ons kry in die Woord.  Maak nie saak hoe groot die donkerte om ons is nie, vandag stap ons die pad van geloof, ons eer die Here.  Wees ʼn lewende getuie van die Here die Almagtige!

Dors vir meer:

Psalm 46 en Handelinge 10:34-48.                                                                                                                                                                                                                                                                                                                                                                                                                                                                              

Gebed

Here my Here.  Ek eer U as die Heilige, die Allerhoogste!  Dankie dat ek in die geloof wat U gee, in alle omstandighede op U kan vertrou.  Lei my om ʼn getuie en ligdraer te wees in hierdie besonderse tyd in ons land.  Amen.

Ds Danie Potgieter

072 272 9631

GK Rietvallei.

Skriflesing: Jesaja 7:1-16
Vers wat Tref: 7:7-9

Jesaja tree nou op as profeet in die tyd van Agas, die derde koning van Juda aan wie Jesaja die boodskap van vernietiging bring. Hier is die eerste keer waar ons lees dat Jesaja persoonlik met ʼn persoon praat en ʼn boodskap bring.
Koning Agas kry berig dat die Aramese koning Resin en die Israelitiese koning Peka kragte saamspan en reeds teen hom optrek. Wat is Agas en die volk se reaksie? Hulle is so bang soos bome wat in die wind waai.
Die Here stuur vir Jesaja om vir Agas ʼn boodskap te bring: “Bedaar! Bly kalm! Moenie bang wees nie! Moet jou nie ontstel nie oor hierdie twee stukke brandhout nie, hulle rook net.”
Die twee konings het groot planne gemaak, hulle wil hulself verryk en die grondgebied van Juda neem.

Maar die Here se pad en plan loop anders. Heeltyd kondig Hy die vernietiging en verwoesting van Juda aan, maar die tyd is nog nie reg nie. Assiër is die magtigste ryk van daardie tyd, maar hulle gaan ook eers verwoes word.
Luister na die antwoord van die Here: Ek, die Here jou God sê vir jou. Dit is die Here wat self praat. Hy bly die God en Here van Juda. Hy is die Here oor die hele aarde en beheer die hele wêreld!
Hierdie konings wat teen jou optrek Agas, hulle is maar net die koning van Aram en die koning van Isreal. Hulle kom maar net van die stede Damaskus en Samaria. Binne 65 jaar gaan hulle so verwoes wees sodat hulle geen volk meer is nie. Niemand kan vir altyd standhou nie. So ook geen situasie of omstandighede nie. Dit gaan nie vir altyd aanhou nie.
Vandag beleef en vrees ons vir Covid-19. Ons vrees en is bang vir wat vir ons ekonomies voorlê. Maar dan antwoord die Here jou God jou: Hierdie is maar net Covid-19, dit gaan ook verbygaan.

Agas moet volhard in sy geloof, so moet ons ook volhard in ons geloof- dit is hoe ons staande gaan bly!

En dan gee die Here die wonderlike teken van die koms van die Messias, Jesus Christus wat genoem word Imannuel, God is met ons. Agas self gaan nie hierdie teken sien nie, die verwoesting moet nog eers plaasvind. Maar vir ons is dit die wonderlike troos- hierdie teken het plaasgevind. God is met ons. Christus het mens geword en onder ons gewoon. Hy weet waardeer ons gaan en wat ons beleef. Christus het gekom sodat ons nooit weer hoef bang te wees nie. Meer nog hy het sy Heilige Gees vir ons gegee. Ons kan uitsien na die volgende teken- Jesus Christus kom weer op die wolke, dan gaan ons vir altyd Immanuel beleef- God is met ons.

Daarom, hou moed. Moenie bang wees nie. Bly kalm! God is met ons! Hierdie is maar net Covid-19.

Dors vir meer:
Matteus 1:18-24 en Genesis 17.

Gebed
Dankie Here dat U my God en Here is. Dankie dat ek nie bang hoef te wees nie. Maak my kalm deur U Gees. Dankie dat ek kan uitsien na die koms van Jesus Christus sodat ek vir ewig by U kan wees. Amen.

Ds Danie Potgieter
072 272 9631
GK Rietvallei.

Skriflesing: Jesaja 6

Vers wat Tref: 6:9

Jesaja 6 begin met hierdie bekende visioen waar hy die heerlikheid van die Here wat op sy troon sit aanskou, met die serafs wat die Here se heiligheid uitroep en dat Sy heerlikheid oor die hele aarde is. (Kyk weer na Dagstuk 31 Maart).

Vandag kyk ons na die mindere bekende deel van hierdie hoofstuk.  Jesaja besef sy onreinheid voor die Here en dat hy woon onder ʼn volk wat onrein is.  Een van die serafs neem ʼn gloeiende kool en raak sy lippe aan en bevestig dat Jesaja se oortredings vergewe is, sy sonde versoen is (vers 7).  Wat is Jesaja se reaksie hierop? “Hier is ek, stuur my Here.”

Sonder om een oomblik te huiwer, is Jesaja gereed om in dankbaarheid ʼn dienskneg te wees om die boodskap van die Here te verkondig. 

Hierdie boodskap is glad nie wat Jesaja verwag het nie, daarom vra hy dan ook: “Tot wanneer Here?”

Moontlik het Jesaja verwag dat die Here gaan sê duisende gaan na die boodskap luister, die hele land gaan op eenslag tot bekering kom (soos Jona vir Nineve die boodskap gebring het).

Jesaja word gestuur om vir die volk te sê dat hulle hoor en niks verstaan nie, kyk en niks sien nie.  Nog meer, hy moet hulle traag van begrip maak, doof en blind, sodat hulle nie bekeer en genees word nie.  Hoor ons hier reg?  Die volk moenie tot bekering kom nie?  Hulle en die land moet eers verwoes word en die land in ʼn puinhoop omskep word.

Jesaja se prediking sal bevestig dat hulle nie wil bekeer nie (vgl. Mt. 13:11-15). Hulle sal reageer soos hulle deurgaans was: mense sonder begrip of verstand, mense wat nie wil hoor of sien nie.  Dit leer ons ook in die Nuwe Testament.  Die oordeel en toorn van die Here is daar waar die Here die mense oorgee aan hulle begeertes en dwaashede om te wat hulle wil doen (Romeine 1:23-24).

Alles gaan tot niet gaan. God gaan vernietig, God wil vernietig.

Maar nogtans is alles nie duisternis nie.  Jesaja moet bly optree en die verwoesting gaan kom, dit gaan nie gekeer word nie.  Maar die Here laat ʼn stomp oorbly.  In Hoofstuk 11 voorspel die Here ʼn wonderwerk wat vanuit hierdie stomp na vore gaan kom.  Sy verbond en raadsplan is nie verby nie.

God voer sy plan uit te midde van ʼn koppige volk (Lees gerus hoofstuk 5 oor die beeld van die wingerd). Daar is nie ‘n maklike evangelie of goedkoop genade nie. Almal gaan nie gehoor gee aan die boodskap van die Here nie.  Vir party is dit ʼn doodsreuk (2 Korintiers 2:14-16). Maar die Here het nog steeds ʼn plan en die tyd wat Hy vasgestel het moet eers verloop.

Uit die stomp kom daar ʼn nuwe begin, nuwe lewe.  Uit die stomp stuur Hy vir Jesus Christus, sy Seun.

Met Christus se koms was daar ook nie kortpaaie nie.  Die evangelie laat ons nie by Goeie Vrydag verby jaag na die oorwinning van die opstandings nie en die hemelvaart nie.

Nou moet ons ook eers die beproewings van die hede beleef voor die heerlikheid van die ewigheid.

Daarom moenie ons Covid-19 net verby wens nie.   Die Here stuur dit ook binne sy raadsplan, ons moet eers deur die beproewing van die hede leef, voor ons die ewige heerlikheid gaan beleef!

Maar laat ons opnuut bewus wees wie is die Here wat ons roep en stuur- al is die hele wêreld se ore en oë toe.  Dank die Here dat Hy ons oë, ore en verstand oopmaak vir sy Woord!

Dors vir meer:

2 Korintiërs 3 en Handelinge 28:16-31.

Gebed

Here die Almagtige.  Drie maal heilig is U Naam.  Dankie dat ons u heerlikheid mag aanskou en beleef oor elke deel van ons lewens.  Dankie dat u ons kragtig in ons werk deur U Heilige Gees.  Dankie dat ons U kan ken en ons harte en verstand geopen is.  Lei ons vandag deur U genade.  Amen

Ds Danie Potgieter

072 272 9631

GK Rietvallei.

Skriflesing: Jesaja 3:13-4:6. Vers wat Tref: Jesaja 3:13 en 4:4.

Jesaja 3 gaan voort met die louteringsoordeel oor die volk. Lees jy meestal net verby hierdie gedeeltes? Die Here het ʼn plan met hierdie oproepe en oordeel. Weereens kry ons die beeld van ʼn regsaak waar die volk skuldig staan en die Here oordeel. Die volk se sondes word vir hulle openlik genoem en uitgewys.
Nie net die leiers se verdrukking en vertrapping word beskryf nie, maar ook die vroue wat deel in hierdie korrupsie. Hulle vertrou en maak staat op die uiterlike dinge wat vir hul “skoonheid” gee en dit maak hulle hoogmoedig. Hierdie status gaan drasties en vinnig verander. Hulle gaan geweldige verlies, ontbering en vernedering beleef.
Die modeskou verander drasties, die spoggerige vrou is ‘n stinkende gebrandmerkte geboeide slaaf in sak geklee (treurende) en kaalkop geskeer (teken van rou en skande). Dit dui op die uiterste armoede, gebrek en skande van die krygsgevangenes wat weggevoer gaan word in ballingskap.

Die Here se raadsplan is groot! Hy wys nie net die oordeel nie, maar maak ook Sy verbondstrou vir die toekoms, na die ballingskap. Daar gaan wonderbaarlike herstel wees, vrugbaar en vol vreugde! ʼn Takkie wat uitspruit sal majesteit en heerlikheid wees vir die oorblyfsel van Israel. Elkeen wat vir die lewe opgeskryf is, sal heilig genoem word. Die Here sal hulle onreinheid afwas. Die Here se teenwoordigheid gaan in Jerusalem sigbaar wees soos destyds met die uittog uit Egipte. Hy sal vir hulle die beskerming en beskutting wees (soos wat ons sing in Psalm 91 en 121).

In hierdie twee hoofstukke vind ons weer die teenstelling van lewe en dood. Die goddeloses kry oordeel en dood, maar die wat die Here uitverkies, lewe en vryspraak. Hierdie profesie dui in die eerste plek op die ballingskap wat sou kom en die herstel wat die Here sal bring, maar ook na die verlossing wat Jesus Christus bring. So het daar uit Jerusalem hierdie “Takkie” uitgespruit na die hele wêreld. Hy gebruik sy Gees wat oor almal is wie se naam in die boek van die lewe staan. Elkeen wat gereinig is deur die bloed van die Lam (Openbaring 7:14).

Wat leer jy uit hierdie gedeelte vir vandag? Die bekering en oordeel oproep is ook vir jou vandag. Voortdurend moet jy jouself ondersoek en afvra: Is my lewe nie dalk ook soos een van hierdie vroue van Jerusalem of soos die leiers nie? Waarin is jou vreugde en wat jaag jy na?
Wonderlik hoor ons nie net die beloftes in Jesaja 4 nie, maar beleef hoe die Here dit in Jesus Christus vervul het! Ek is reingewas deur die bloed van Christus, lewe in die teenwoordigheid van die Here en sy Gees is saam met my! Ek kan uitsien na die ewige nuwe Jerusalem waar ek altyd saam met die Here gaan bly!

Dors vir meer:
Jeremia 23:1-8 en Psalm 91.

Gebed
Enigste Here. Dankie dat U ons geheilig het en afsonder vir U. Dankie vir U teenwoordigheid oor ons deur U Heilige Gees. Lei ons om ons te bekeeer van enige sondes wat ons nog probeer wegsteek. Amen.

Ds Danie Potgieter
072 272 9631
GK Rietvallei.

Skrifgedeelte: Jos 18                                  Teks wat tref: v3

Tema vir die week: Geloofslesse vir liggaam en siel

Na 29 dae van die Inperking as gevolg van die Covid 19 pandemie is daar verwagtinge dat die situasie moet verander.  Benewens die impak van die siekte word die ekonomie en sosiale welstand van baie beïnvloed. 

In die laaste  dagstuk van hierdie reeks ontmoet ons die volk by  ’n groot volksvergadering in Silo waar Josua by die volk wou weet waarom hulle so lank talm om die verowerde gebiede te beset.  Die volk het nou reeds vir veertig jaar deur die woestyn gereis en eindelik die land wat die Here aan hulle beloof het binnegegaan.

Tog is daar ’n sekere deel van die volk wat hierdie hoogtepunt nie ewe entoesiasties beleef nie.  Hulle talm om dit wat die Here gegee het in ontvangs te neem.  Daar is ’n gebrek aan gebrek aan ywer en entoesiasme.  ‘n Trae onsekerheid in hul optrede is sigbaar. 

In vele opsigte ervaar ons vandag ook hierdie tendens. Juis nou met die Covid 19 pandemie is dit belangrik om te bly fokus en deeglik perspektief te hou.  Ons mag redeneer dat hulle teen hierdie tyd darem al moeg kon gewees het van die lang reis deur die woestyn. 

Maar die Here gee ’n pragtige oplossing.  Josua stel onmiddelik ’n aksieplan op.  Drie man uit elke stam kry ‘n duidelike opdrag om die land te verken.  Die werk word  in kleiner dele opgedeel  as dit te groot is.

Laat alles wat gedoen moet word in die teenwoordigheid van die Here geskied. 

Die Here verlang die volgende:

• Tree doelgerig op.
• Stel aksieplanne op.
• Gee tydsafbakening en sperdatums waarbinne elke huishouding hul aktiwiteite en dae beplan. 

Al weet ons nie hoe die toekoms verloop nie, bly die opstanding van Christus ons hoop gee.

Ons beplan en dagboek alles – Waarom dan nie juis nou nog meer ook ons geloofslewe nie?

Dors vir meer:

2 Kor 6:1-13

Gebed

Gee aan my die moed om doelgerig te lewe en elke oomblik voluit te gebruik. Amen

NS – Neem asseblief vrymoedigheid om ons predikante te skakel vir verdere gesprek en pastorale begeleiding. Ons neem beurte met die dagstukkies. Besoek ook Gereformeerde Kerk Rietvallei se Facebook- of webblad vir meer inligting.

Petrus van Blerk

0824560235