Category: Uncategorized (Page 23 of 33)

1 Petrus 5:1-4
Teks wat tref: 1 Petrus 5:2.
“Pas die kudde van God wat aan julle toevertrou is, goed op. Hou toesig oor hulle, nie uit dwang nie, maar gewillig soos God dit verwag; nie om eie gewin nie, maar uit toegewydheid;.”

Hoeveel keer kry ons nie die beeld van die herder in die Ou en Nuwe Testament nie? In hierdie teksgedeelte word vir ons uitgewys dat Christus Jesus die Opperherder is oor die gemeente en ook oor jou lewe! So pas die Here sy skape op deurdat Hy sy Heilige Gees vir ons gegee het en gawes vir die gemeente gee.
Vanoggend leer die Here ons eers hoe die herders na die kudde moet kyk en dan kyk ons DV môre hoe die skape ook na die herders moet luister.

Petrus beskryf die taak van die ouderling baie eenvoudig. Pas as herders die kudde van die Here goed op. Die gemeente is die kudde van die Here is, dit is sy eiendom. Rietvallei is nie die gemeente van die kerkraad van Rietvallei nie, dit is die gemeente van Jesus Christus. Petrus gee glad nie ʼn opdrag hoe die strukture moet wees nie, maar die gesindheid waarmee die roeping uitgeleef moet word. 3 dinge word gestel oor wat ʼn dienaar nie moet doen nie en 3 wat ʼn dienaar moet doen.
Pas die kudde van God wat aan julle toevertrou is, goed op. Hou toesig oor hulle, nie uit dwang nie, maar gewillig soos God dit verwag; nie om eie gewin nie, maar uit toegewydheid; ook nie deur baas te speel oor dié wat God aan julle sorg toevertrou het nie, maar deur ‘n voorbeeld vir die kudde te wees.

So is hierdie boodskap spesifiek aan die ouderlinge gerig, maar so moet die gesindheid wees by alle gelowiges. Ons almal staan in God se diens. Dit sluit aan by 2 Timoteus 2:15. Lê jou daarop toe om jou tot beskikking van God te stel as ‘n arbeider wat die goedkeuring van God wegdra, ‘n arbeider wat hom vir sy werk nie hoef te skaam nie, wat die woord van die waarheid suiwer verkondig.

Doen dit tot en met die wederkoms van die Opperherder wat die heerlikheid as oorwinnaarskroon gee, ʼn kroon wat nooit sal vergaan of iemand ooit kan wegvat nie!

Dors vir meer:
2 Timoteus 2:14-26 en Titus 1.

Gebed
Psalm 23.
Die Here is my herder, ek kom niks kort nie.
Hy laat my rus in groen weivelde.
Hy bring my by waters waar daar vrede is.
Hy gee my nuwe krag.
Hy lei my op die regte paaie
tot die eer van sy Naam.
Selfs al gaan ek deur donker dieptes,
sal ek nie bang wees nie,
want U is by my.
In u hande is ek veilig.
U laat my by ‘n feesmaal aansit,
terwyl my teëstanders moet toekyk.
U ontvang my soos ‘n eregas,
ek word oorlaai met hartlikheid.
U goedheid en liefde sal my lewe lank by my bly
en ek sal tuis wees in die huis van die Here
tot in lengte van dae.
Amen.

Ds Danie Potgieter
072 272 9631
GK Rietvallei.

1 Petrus 4:12-19
Teks wat tref: 1 Petrus 4:16
“Maar wanneer iemand ly omdat hy ‘n Christen is, moet hy hom nie daaroor skaam nie. Inteendeel, as draer van daardie naam moet hy God verheerlik.”

Net voor Jesus se kruisiging het Petrus Jesus verloën omdat hy bang was vir vervolging en lyding. Hy was bitterlik jammer daaroor en later in sy lewe het hy nie weer terug gestaan daarvoor nie.

Daarom kan hy ons oproep om nie lyding en vervolging te vrees ter wille van ons Christenskap nie. Indien daar lyding en vervolging oor jou pad kom omdat jy Christus se voorbeeld uitleef, dan hoef ons nie met aggressie en onbegrip reageer nie. Hoe moeilik dit ook al klink, jy kan dit as ʼn vreugde beleef om daardeur God te verheerlik. Daarom kan jy nog steeds voortgaan om God te doen. Veral omdat jy weet die Gees van God bly op jou. Jy hoef dit ook nie alleen te doen nie, as een lid van die liggaam ly, ly almal saam. Jy het die voorreg van ʼn geloofsgemeenskap wat mekaar opbou, versterk en bemoedig vanuit God se Woord.

Dit is beter om in dié lewe deur die smeltkroes van lyding te gaan en in die proses al hoe nader aan God te kom, as om die lyding te probeer vermy deur aan God ongehoorsaam te word.
Die saligste wete is dat jy jou lewe aan God kan toevertrou, Hy wat getrou is!

Hoe gaan jy God verheerlik hierdie week?

Dors vir meer:
Johannes 15:18-27 en Filippense 4:1-9.

Gebed
My Vader wat in die hemel is. Versterk my deur U Gees om lyding ter wille van U naam nie te vrees nie, maar sodat ek U daardeur kan verheerlik. Amen.

Ds Danie Potgieter
072 272 9631
GK Rietvallei.

Wat moet jy doen as die einde naby is?

1 Petrus 4:7-11

Teks wat tref: 1 Petrus 4:7

“Die einde van alles is naby. Daarom moet julle selfbeheers en nugter wees, sodat julle kan bid.”

Die einde van alles is naby!  Dit is vir ons ʼn groot troos, die einde is in sig!  Dit gee ons hoop en spoor ons aan om met nuwe ywer te werk te gaan.  As ons hoor die einde van alles is naby, gaan sit ons nie in sak en as en wag dat als moet nou verbygaan nie.  Nee, ons werp dan juis alles in die stryd!

Totdat die einde daar is, moet jy jou toespits om selfbeheers en nugter te wees. Jy leef nog steeds deur die Gees!  Laat ons in hierdie tyd veral ons self beheer, veral voordat ons iets sê of doen.  Ons kan so maklik inval by die persone om ons, maar val ons volkome in by wat God wil?

Wees ook nugter, nie net om jou nie oor te gee aan drank of ander middels nie.  Nugter beteken dat jy jouself in ʼn posisie sit waar jy self bepaal waarmee maak ek my program vol en wat is my prioriteite (gemeet aan God se Woord).  Ek reageer nie net op die krisis in die wêreld of wat ander van my wil hê nie. 

Saam met dit is daar drie aksiestappe wat ek moet uitleef:

1.  Jy moet aanhou om mekaar hartlik lief te hê!  Ook nou moet ons oogmerk wees om nie net vir myself uit te kyk nie, maar my dade moet na buite gerig wees op ander en hoe kan ek vir hul tot voordeel wees.
2. Wanneer ek lief is vir ander, dan is dit selfsprekend dat ek ook gasvry sal wees.  Die Here het vir jou ʼn plek in sy Vaderhuis gegee, is daar dan plek vir ander by jou huis?  Gasvryheid beteken nie net om ander in jou huis te ontvang nie, maar dat ek bereikbaar is vir ander, veral vir ander in die gemeente.  So kan ons nog steeds gasvry wees teenoor mekaar.
3. Gebruik jou genadegawe wat God vir jou deur die Heilige Gees gee, vir die onderlinge diens in die gemeente.  Hierop kan jy jou veral toelê in die Inperking tyd.  Dit doen jy nou sodat God vir ander sigbaar word deur jou uitlewing van jou gawes sodat God verheerlik kan word!

Laat ons nou opnuut gehoorsaam wees aan Christus se opdrag in Matteus 5:16. “ Laat julle lig so voor die mense skyn, dat hulle julle goeie werke kan sien en julle Vader wat in die hemel is , verheerlik.”  So kan ons die voorbeeld van Christus volg wat gekom het, nie om die aandag op Hom te trek nie, maar sodat die Vader verheerlik kan word.

Dors vir meer:

1 Korintiërs 12:8-11 en Matteus 5:13-16.

Gebed

Here ons Vader, lei ons dat ons U kan verheerlik deur ons optrede en dade.  Dankie dat U ons roep en vir ons U Gees gee om mekaar te kan opbou om U te verheerlik.  Amen.

Ds Danie Potgieter

072 272 9631

GK Rietvallei.

Breek weg van die stroom van die ou mens en leef in die lewende stroom van God se wil!

1 Petrus 4:1-6

Teks wat tref: 1 Petrus 1:2

“… vir die res van sy aardse bestaan word sy lewe nie meer beheers deur menslike begeertes nie, maar deur die wil van God.”

Omdat ons verseker is dat ons deel in die opstanding van Jesus Christus besef ons opnuut maar ons het met die sonde afgereken.

Die verlossing is vir ons gegee deur Jesus Christus wat sy bloed vir ons gestort het.

Dit vra nou van ons om vir die res van ons aardse bestaan te breek van die stroom waarmee die wêreld mense meesleur.  Ons is nou nie meer langer vasgevang in hierdie stroom wat beheers word deur sondige begeertes nie.  Kyk net na die wêreld om ons- samelewings word beheers en afgebreek deur mense wat hulle begeertes vrye teëls gee.

Ons leef nou vanuit die stroom van God se wil, lewe vanuit die lewende water wat ons by God kry.

Wat is die reaksie van die wêreld?  Hulle vind dit vreemd dat ons nie met die stroom wil saamgaan nie en daarom word ons beswadder.  Daarom herinner Petrus vir ons, maar ons lyding en beswaddering van die wêreld is vir ons ʼn bevestiging dat ons met die sonde afgereken het.

Moenie jou laat meesleur met die stroom van die wêreld nie – almal sal moet rekenskap gee aan Hom wat klaar staan om te oordeel.

Lewe soos God wil hê ons moet lewe en al sal ons liggaam sterwe, gaan ons na die gees lewe soos God lewe – totdat ons die verheerlikte liggaam ontvag.

Dors vir meer:

Hebreërs 11:32-40 en Kolossense 1:9-11

Gebed

Here dankie dat ons nie hartseer moet wees as die wêreld ons verwerp omdat ons vanuit U wil lewe nie.  Dankie dat ons kan lewe in die stroom van U redding, genade en heerlikheid.  Amen.

Ds Danie Potgieter

072 272 9631

GK Rietvallei.

Skrifgedeelte: Ps 127:1-5                    Teks wat tref: v1

Koning Salomo was nie net bekend vir sy wysheid, insig en ongelooflike rykdom nie. Hy neem verantwoordelikheid om die tempel van die Here te bou.  Hiervoor het Dawid hom deeglik voorberei. Salomo word deur die Heilige Gees gelei om met groot onderskeidingsvermoë en deeglike beplanning die tempel en sy koninklike paleis te voltooi.  Dit neem hom ongeveer twintig jaar vir die twee bouprojekte.  Hy maak gebruik van plaaslike arbeid en voer die beste hout, goud en boumateriaal van ver lande in.  Logisties bly hierdie een van die grootste projekte en konings en vername mense stroom daarheen om dit te aanskou. Sonder God sou Salomo nooit suksesvol gewees het nie. 

In die lig hiervan begin Psalm 127 by die Here.  Met hierdie vertrekpunt is dit duidelik dat God die Argitek en Boumeester moet wees.  Die woordkeuse in vers 1 stel dit onomwonde dat daar geen ander moontlikheid bestaan nie.  Sonder God is al die inspanning tevergeefs.  Sonder God se beskerming is daar geen veiligheid nie.  Geen menslike poging sal sukses behaal nie. Al staan jy vroeg op en gaan slaap laat, sal dit niks baat nie.  Die huidige omstandighede waarin ek myself bevind weerspieël iets hiervan. Lang ure, uitgerekte vergaderings en beplanning tot laatnag, is so deel van my bestaan dat ek letterlik nie meer lig sien nie.  Die Prediker roep uit dat daar van alles niks kom nie.

Beter beplanning en haarfyn tydsberekening neem nie die moeite weg nie.  Ons swoeg en sweet en jaag na niks. Tog is daar ʼn ander moontlikheid. “Vir dié wat Hy liefhet, gee die Here dit in hulle slaap.”  Onverdiend. Sonder enige bydrae en inspanning van my af. My beste pogings is nutteloos.  Net God se genade bring vreugde.  Daarby word nog meer gevoeg.  Die bouwerk vlot en die Here gee boonop kinders om in die huise te baljaar.  Kinders is ʼn geskenk van die Here en ʼn groot nageslag was ʼn bewys van de Here se seën. Met nog ʼn beeld verseker die Here ook dat die stad veilig sal wees.  Die krygers wat gereed en deeglik voorbereid is met ʼn pylkoker wat gevul is, het in oorlogstaal oorwinning verseker. Die wat God liefhet kry nie net ʼn huis nie maar geniet die Here se beskerming.  Met die Here aan jou kant is jy so goed bemagtig dat jy in die stadspoort kan onderhandel.  Deur Christus se opstanding het die Here my bemagtig sodat my dienswerk nie tevergeefs is nie. 

Moenie op jou eie insigte staatmaak nie, en laat die Here die bouwerk doen. 

Dors vir meer:

Jes 66:1,2 en Mt 7:24-29

Gebed

Here, lei my om op die regte fondament te bou. Stuur U Heilige Gees om my van my eiegeregtigheid te laat afsien.  Neem my lewe in U hande.  Amen

Ds Petrus van Blerk

0824560235

Skrifgedeelte: Hooglied 2:1-16                      Teks wat tref: v16a

Die wysheid wat Salomo van die Here ontvang het, lei daartoe dat die hele volk hoë agting vir hom kry. Hy beïndruk met sy regspraak en onder sy bewind beleef die volk groot voorspoed. In Hooglied 3:11 sing die vroue van Sion oor die dag van Salomo se huwelik, die dag van sy grootste vreugde. In Hooglied word liedere oor die liefde opgeteken en word dit aan Salomo opgedra.  Alhoewel hy na alle waarskynlikheid nie die skrywer van die boek Hooglied was nie, luister ons na wysheid wat vir die verhouding tussen man en vrou geld. 

Dit word uit sewe liedere saamgestel met waardevolle lesse vir elke man en vrou. Hoofstuk 2 begin met liefdestaal waar die bemindes met treffende beelde die skoonheid en aangetrokkenheid van en vir mekaar verklaar.  Die vrou is veel meer as ʼn affodil en lelie. Sy staan uit. Die man sien haar skoonheid en eienskappe raak. Vir haar is hy soos ʼn appelboom tussen die wilde bome. Hy staan uit. Sy sien uit na die man se versorging. Hy voorsien skaduwee en voedsel. Die verdere beelde en vergelykings is treffend om hul verliefdheid en aangetrokkenheid tot mekaar te beskryf. Hulle het ʼn intense verlange om vir ewig bymekaar te wees.

Die man spring oor die berge en wip oor die rante in pure opgewondenheid en hy is haastig om haar te sien. In afwagting op sy aankoms berei sy haar voor om haar gesig vir hom te wys en haar strelende stem te laat hoor. Die liefde tussen man en vrou word met hierdie beelde beskryf om die teerheid en wonderlike samesyn van huweliksgenote te verduidelik. Dit is ʼn besondere diepgaande verhouding tussen man en vrou. 

Tog is alles nie net maanskyn en rose nie en kan ons ook die praktiese raad in vers 15 ter harte neem. Dit is gewoonlik die kleinste menigsverskille en iets wat totaal onbeduidend en betekenisloos is wat spanning in ʼn huwelik veroorsaak. Dink gerus waaroor ʼn argument gaan en waar dit begin het?  Werk elke dag aan die kommunikasie en respek vir mekaar in jul huwelik.

Na alles word hierdie verhouding in vers 16 beseël met ʼn liefdesverklaring: – Jy is myne.  In verbondenheid aan mekaar is die man en vrou op mekaar aangewese en neem hul verantwoordelikheid om dit wat hul saam met mekaar deel en ontvang het ewig te koester. 

Toe Christus aan die kruis sterwe hoor ons ook sy laaste woorde waarmee Hy uitroep dat ons aan Hom behoort en dat Hy ons ewig liefhet. Die huwelik word meermale in die Bybel met die verhouding tussen die Here en sy kerk vergelyk. God het jou so lief dat Hy uitroep: “Jy is Myne”

Dors vir meer:

Ef 4:21-33

Gebed

Here, dankie dat U my liefhet. Maak my ywerig en opgewonde om in U diens te mag staan.  Verwyder die lastige klippie in my skoen wat die oorsaak van onmin en hartseer is.  Maak my al meer deel van U. Amen

Ds Petrus van Blerk

0824560235

Skrifgedeelte: 1 Kon 3: 16-28                      Teks wat tref: v28

Koning Salomo was een van die mees invloedryke konings van die volk Israel. Hy het bekendheid verwerf toe die Here in ʼn droom aan hom verskyn het en Salomo gekies het om aan die Here gehoorsaam te wees. (1 Kon 3:5,9). Hiervoor beloon God hom deur aan hom wysheid, insig en rykdom te skenk.  Op ʼn keer moet hy hierdie wysheid en insig gebruik om uitspraak te lewer in ʼn saak waar lewe of dood ter sprake is. 

Reeds in Salomo se tyd is dat hartseer dat prostitute al naby die volk se aanbiddingsplekke hul dienste saam met die aanbidding van afgode aangebied het. Nietemin word Salomo se insig vereis om regspraak te lewer.  Die koningin van Skeba het Salomo se wysheid besing.  Hier wend twee vroue hul na hom.  Inderdaad ʼn vreemde en komplekse situasie. Maar God se wil geld vir almal op elke plek, ongeag jou stand, posisie of rykdom.

Hierdie is ʼn toets vir Salomo se insig.  Ons kan aflei dat die twee vroue moontlik vriendinne was. Hulle woon in dieselfde huis en binne drie dae na mekaar word ʼn baba vir elkeen gebore.  Daar word vertel dat hulle alleen in die huis was. Niemand anders nie, net hul  twee.  Dit beteken dat daar geen ander ooggetuies was wat in hierdie saak kon getuig nie.  Onder normale omstandighede sou die getuienis van ander hierdie saak vergemaklik. 

Die vroue verskyn voor die koning en stry met mekaar.  Beskuldigings word heen en weer rondgeslinger.  Elkeen het ʼn teenargument gereed. Dit is die een se woord teen dié van die ander. Die een se hart krimp ineen en die ander een eis wraak.  In afwagting om hul saak te wen staan die vroue gereed terwyl Salomo by homself redeneer.  Hiermee bewys Salomo sy insig.  Hy gaan nie oorhaastig ʼn besluit neem nie. In die beoordeling van sake moet ons ook leer om geduldig alles te oorweeg. Ouers ken hierdie situasie maar al te goed as hul ʼn geskil tussen kinders moet oplos. 

Dan gee Salomo ʼn vreemde opdrag.  “Bring vir my ʼn swaard!”  By die reeds bestaande hartseer beveel hy dat die kind wat lewe in twee stukke gesny moet word en dat elke vrou ʼn helfte moet kry.  Ons roep dadelik uit dat dit wreed is.  Salomo kry die oplossing in die optrede van die vroue. Hy  sien as’t ware hul harte raak.  Die hart is die setel van ons lewe.  Die moeder wat eerder wil hê dat die kind moet bly lewe word deur Salomo raakgesien. Sy begeer eerder dat ʼn kind moet bly lewe as dat nog een moet sterwe.  In die sesde gebod beskerm God die lewe wat Hy geskenk het. So weet Salomo watter vrou die kind moet kry.

Salomo tree in diens van die Here op deur aan Hom gehoorsaam te wees.  Almal hoor van sy uitspraak en kry hoë agting vir die koning.  God vra dat ek ook vandag na sy uitsprake sal luister.  Christus het met sy sterwe en opstanding ons elkeen ook ʼn koning, priester en profeet gemaak. Rig jou lewe so in dat jou woorde en dade van gehoorsaamheid getuig.  Maak seker dat jy genoeg tyd saam met God spandeer dat jy met wysheid die vraagstukke van elke dag kan aanspreek. 

Dors vir meer:

Heb 4:12-16 en Jak 2:1-13

Gebed

Here, leer my om mense nie op hul uiterlike te beoordeel nie. Laat U Heilige Gees my besluite rig. Dankie dat U die bedoelings en gedagtes van my hart deur Christus verander om in U koninkryk diensbaar te wees.  Amen

Ds Petrus van Blerk

0824560235

Skrifgedeelte: 1 Kon 3: 2-15                        Teks wat tref: v5,9

In Spreuke het ons geleer dat wysheid begin met die dien van die Here. Baie van daardie Spreuke is deur Salomo opgeteken en is vandag nog steeds van onskatbare waarde. Hierna gaan ons verder lees van die koningskap van Salomo en die toepassing van wysheid wanneer ons lewensvraagstukke hanteer. 

Koning Salomo was een van die mees invloedryke konings van die volk Israel. Tydens sy regering word ʼn tempel vir die Here opgerig, beleef die volk voorspoed en ontvang hy besoeke van ander hooggeplaaste wêreldbekendes.  Die koningin van Skeba merk na ʼn besoek op dat die helfte van Salomo se wysheid haar nie van vertel is nie.

Dit begin met ʼn droom waarin die Here aan Salomo verskyn het terwyl hy na Gibeon gegaan het om daar te offer.  Nadat Dawid opdrag gegee het dat Salomo heerser van Israel en Juda moet wees (1Kon 1:35), beleef Salomo talle onstuimighede. Eindelik kry hy ʼn stewige houvas op die koningskap.  Hy gee gehoor aan sy vader Dawid se opdrag deur alles te doen wat vir hom voorgeskryf is. Salomo het die waarde van gehoorsaamheid besef. Mag dit ons ook aanspoor om so te leef. 

Toe die Here aan Salomo verskyn en vir hom vra wat Hy vir hom moet gee, betoon Salomo die nodige eerbied en respek. Hy buig voor God en erken dat alles wat hy ontvang het van die Here kom.  Sy koningskap is aan God te danke.  Hy vertrou volkome op die Here.  Hy stel homself onder God se gesag.  Hy bely ook sy eie tekortkominge wanneer hy erken dat hy nog jonk en onervare was en oor ʼn groot volk moet regeer.

Wat sou jy vra as jy enige iets kan kry? Die ark van die Here (simbool van God se teenwoordigheid) het by Gibeon gestaan.  Salomo het juis daarheen gegaan om hom vir sy verdere koningskap voor te berei. Hy vra die Here vir die dinge wat hy nodig het om sy werk te doen. Ons begeer dikwels dat die Here my van ʼn situasie sal onttrek of my omstandighede sal verander.  Dit is dan juis vir daardie dinge wat ons sal vra?

Met sy keuse vra Salomo dat hy aan die Here gehoorsaam wil wees. Daarmee sal hy oor die volk regeer wat God uitgekies het.  Hy werk waar die Here hom plaas.  Hy tree doelgerig op en dui noukeurig aan presies wat hy nodig het.  Sy keuse is gerig op diens aan die Here. Dan word hy beloon met veel meer as wat hy ooit kon dink.  Hy ontvang ook wysheid, insig en rykdom in oorvloed soos niemand voor hom gehad het nie of na hom sal hê nie.  Salomo se insig in regsake word later oral bekend.

Met sy hele lewe is Christus aan God gehoorsaam. Hy openbaar sy insig wanneer Hy die vrae van wetgeleerdes wat Hom wil verkleineer beantwoord en hul valsheid en selfsugtigheid ontbloot. 

Vra vir God om vir jou die dinge te gee wat jy in jou dienswerk in sy Koninkryk nodig het

Dors vir meer:

Mk 12:13-17

Gebed

Here, leer my om die plekke waar U my wil gebruik raak te sien.  Help my om aan U gehoorsaam te wees. Dankie dat U die wêreld deur U Seun se wysheid en insig verander. Amen

Ds Petrus van Blerk

0824560235

Dagstukkies 03 – 07 Augustus 2020

In Spreuke kry ons kry wyse raad vir ons huwelik, werksituasie, opvoeding, humeur, skinder, eerlikheid en ander.  Hiermee die laaste dagstuk in hierdie reeks.  Hierna gaan ons verder lees van die koningskap van Salomo en die toepassing van wysheid wanneer ons lewensvraagstukke hanteer. 

Dagstuk 03 Augustus 2020 – Dien die Here

Skrifgedeelte: Spreuke 31: 1-31                          Teks wat tref: v1,30

Aan die einde van ʼn reeks dagstukkies uit Spreuke sou mens wonder wat ʼn treffende en toepaslike slot sou wees.  Dalk ʼn enkele vers of Spreuk wat ek elke dag kan saamneem. Iets van besondere betekenis vir ʼn situasie waarin ek my dalk bevind.  Of ʼn Spreuk met ʼn boodskap van hoop. Ons gaan na die woorde van koning Lemuel luister. Hy het die voorskrifte van sy moeder ontvang. (v1)

Hy is ʼn redelike onbekende koning. Sy naam kom slegs 2 keer in die Bybel voor en beteken –  “vir God”.  Hy vat talle van die voorafgaande Spreuke vanaf vers 10 pragtig saam.  Spreuke 31 het ʼn paar toepassings moontlikhede. Dit beskryf die deugde van ʼn knap vrou. Beeldskoon, pragtig, statig en skatryk. Elkeen sal graag so lewensmaat wil hê. Die ideale droomvrou. Troumateriaal sê ek jou.

Maar tog gaan dit hier oor meer as dit. Daar bestaan ʼn noue band tussen Lemuel en sy Moeder.  Vanaf vers 10-31 word in die oorspronklike taal die 22 letters van die Hebreeuse alfabet gebruik. Dit beteken dat die skrywer poog om ʼn volledige lys te gee. Met die beskrywing van die ideale vrou se karaktereienskappe is dit duidelik dat sy die koppe laat draai met haar skoonheid. Sy kan feitlik enige iets doen en is invloedryk.

Daar is ʼn ander bedoeling. Elke mens is te uniek geskape dat daar ʼn paar stereotipes moet wees. Dit is logies dat ons  nie ʼn soort universele beeld mag skep nie. Nie elke vrou is soos die vrou in Spreuke 31 nie. Daar word dikwels in Spreuke na “Wysheid” as ʼn vrou verwys.  Die inhoud van Spreuke leer ons van ʼn doelgerigte lewe waarmee ons God eer.  Wysheid word met ʼn vrou gepersonifiseer. 

Spreuke leer mans en vroue oor ʼn lewe wat God verheerlik. Daarom moet ons almal die karaktertrekke van Spreuke 31 vertoon:

V10 – Ons is KOSBAAR in die Here se oë. Baie meer as edelstene. So kosbaar dat Jesus Christus met sy lewe vir my betaal het.

V11,12 – Ons moet BETROUBAAR wees. – Ander mense moet op my kan steun.

V13  – Wees HARDWERKEND – verwerk produkte en bring kos in deur vroeg op te staan.

Dan word die belangrikste eienskap in vers 30 genoem. Daar is baie dinge wat ophou bestaan en uiteindelik tot niet gaan. Die vrou wat die Here DIEN, moet geprys word.  Van alles wat ons doen is my verhouding met die Here die belangrikste. Lees weer Spreuke 1:7: “ Kennis begin met die dien van die Here.” Spreuke eindig met die duidelike opdrag om die Here te dien.  Henry Mathew het gesê: “Gebruik hierdie Bybelboek as ʼn spieël waarin jy jou verhouding met die Here meet.”

Jesus Christus het ons met God versoen sodat ek aan God se opdragte kan voldoen. 

Dien die Here met jou hele lewe!

Dors vir meer:

Openb 21:9-27

Gebed

Here, dankie vir U oneindige liefde. Dankie dat die Heilige Gees my leer hoe om elke dag te lewe.  Rig my woorde, dade en gedagtes op ons Here Jesus Christus om my te lei en te bewaar. Amen

Ds Petrus van Blerk

0824560235

Skrifgedeelte: Spreuke 25:1-28                         Teks wat tref: v1,28

Die menslike wil staan teenoor God se eer en dit gebeur maklik dat ek dink dat my eie gedagtes reg is.  In die bundel Spreuke van Hiskia word daar wyshede  gegee en word daar slegs binne die beskerming van ʼn “muur” rondom my verseker dat ek in die grense leef wat God gestel het. 

Spreuke 25 vra een van die moeilikste dinge. Dit sny tot op die been oop. Hier word gepraat oor dit wat ek nie self graag wil hoor nie. Die Here wil weet hoe jou lewe vandag lyk?  Daar is sekere dinge wat bekend is en dan daardie dinge wat verborge is. Om dit te bepaal begin ons by vers 2:“ die eer van God lê in wat Hy verborge hou….” Dit beteken dat daar dinge is wat nie bekend is nie. Amper onverklaarbaar want dit is te hoog en te diep vir ons menslike verstand. Hier ontmoet ons die Almagtige God met eerbied en ontsag. Dit laat ons in aanbidding op ons knieë neerval.

Ons verstaan eers wat dit regtig beteken as ons in die res van hoofstuk 25 gelei word om ons lewens te ondersoek. Die een enkele ding waarmee ons die meeste sukkel het net twee letters: “EK” – Ons sluit die Here se maklik uit. Met selfbeheersing kry God die eer.

Die Here smelt my lewe in ʼn reinigingsproses om die slegte uit die silwer te haal. Daarna volg ʼn skeidingsproses waarmee die slegte gewoontes ( misbruik van mag, geld en posisie) verwyder word.   Ons aanstellerigheid  (hoogmoedigheid, skynheiligheid en valsheid) moet verwyder word sodat ek aan Hom die eer gee. Die Gees leer ons van selfbeheersing deur verkeerde gesindhede af te breek.   Met hierdie optrede leer Spreuke my om God te eer.

In vers 28 word dieselfde vraag net bietjie anders gestel. Deur watter muur word jou lewe begrens en beskerm? Al die beelde in die voorafgaande verse gee vir ons duidelike grense en riglyne. As jy jou lewe so beheer kry God al die eer.  In die stryd teen die eie EK is selfbeheersing aller noodsaaklik.  Ek is my eie grootste vyand. Dit is waarom vers 28 selfbeheersing so hoog ag.  Edmund Hillary, die eerste mens wat Mount Everest kon oorwin, het opgemerk dat dit nie die berg is wat jy oorwin nie, maar jouself.

Daar is baie dinge wat verborge is. Trouens soos Spreuke 25:1 sê: “Die eer van God lê in dit wat Hy verborge hou.”  Maar wat nodig is het Hy bekend gemaak.  In Christus word God se liefde sigbaar.  Met sy lewe kom staan Christus letterlik rondom my.  Deur die Gees word ek beskerm en beskut. 

In my lewe is daar baie dinge bekend. Maar ek steek ook liewer sekere dinge weg. Daardie dinge wat my laat wankel.  Soos die stad sonder mure. Iemand met selfbeheersing leef binne die grense wat God gestel het.

Leef binne die mure van daardie stad!

Dors vir meer:

Gal 5:22-26 en 2 Pt 1:3-15

Gebed

Here, U weet hoe dikwels my swak oordeel groot smart en skade veroorsaak. Leer my om van my eie ek af te sien en lei my deur U Gees om binne die mure wat U gestel het te leef.   Dankie dat U my met soveel liefde omring. Amen

Ds Petrus van Blerk

0824560235