Author: Karen de Lange (Page 26 of 33)

Skriflesing: Maleagi 1:6-14                  Teks wat tref: v 6,14

Adam en Eva skuif die Here uit hul lewe met hul besluit om na die Satan te luister.  Eli laat na om sy seuns te berispe.  Die priesters waarvan ons in Maleagi 1 lees minag die Here op die mees blatante wyse.  Hulle trek hul neus vir die Here op. Hulle offer gesteelde, lam en siek diere.  Kortom, hulle het geen eerbied vir God nie. 

In vergelyking met die optrede van Adam en Eva, Eli en ander mense waarvan ons lees verdring hulle die Here die meeste.  Hulle optrede word nie eers geheim gehou nie want die offers is voor die oë van die volk by die tempel gebring.  Hulle dienswerk word moeite.  Hierdie optrede getuig van selfsug en grootheidswaan.  Die priesters het nie eens die eer van ʼn seun vir sy vader en ʼn slaaf vir sy eienaar nie. 

Hulle hoor nie die stem van die Here die Almagtige nie.  God openbaar Hom aan hulle as die Grootkoning.  Al die ander nasies het vir Hom ontsag.  Alles is onder God se mag.

Ons veroordeel hierdie optrede en verwys met misnoeë na hul dade.  Maar net totdat ek my eie optrede beoordeel.  Ons sal nooit openlik teen die Here draai nie.  Ons sal ons slegte dade en verkeerde optrede probeer wegsteek en met verskonings en verontskuldigings verbloem.  Maleagi is die laaste boek in die Ou Testament. As profeet word hy deur God gestuur om die oortredinge van die volk uit te wys. Inteendeel, hoor ons in 6 dat dit God die Almagtige is wat na hul optrede vra. 

Dit is harde woorde en ʼn sterk berisping wat God gebruik om die volk wakker te laat skrik en hul weer op die pad terug na Hom te lei.  Dit is juis God se genade en liefde wat ons hier sien.  Hy maak met hul bemoeienis.  Kom ons maak dit ook op ons lewe van toepassing. God kyk na my hele lewe.  Ons sondig dalk nie so ooglopend openlik nie. Maar die Here weet wanneer ek my neus vir Hom optrek as ek nie my sin kan kry nie.  Hy weet wanneer ek nie met volle oorgawe leef nie.  Met die inperking weens Covid 19 het ons omstandighede drasties verander. Ons moes leer om op ander maniere te aanbid. Ons moes opofferings maak. 

Ons beleef ook elke dag God se liefde. Dit is juis omdat Hy ons liefhet dat hy na ons welstand en optrede verneem. Met Christus se koms na die aarde moes Hy ook valse aanklagte trotseer. Daar word die spot met Hom gedryf.  Hy  word saam met misdadigers gekruisig.  Hy staan uit die dood op sodat ek verlos kan word. 

Ondersoek jou lewe en bepaal of jou optrede God eer.  Ons lees more in Maleagi 3 verder oor die veranderinge wat gemaak moet word sodat ek God reg sal eer. 

Dors vir meer:

Mt 27:32-44

Gebed

Here, dankie dat U my liefhet.  U weet hoe maklik ek my rug op U draai asof U soms nie daar is nie.  U weet alles. Stuur u Gees om my op koers te bring.  Amen

Ds Petrus van Blerk

GK Rietvallei

0824560235

Skriflesing:   1 Sam 2:13-26     Teks wat tref:  v 23,24            

Dit bly een van die grootste uitdaging om ʼn gesonde balans te handhaaf. Alhoewel omstandighede gewoonlik ʼn pertinente rol speel is dit nie altyd ewe maklik om konsekwent op te tree nie.  Dit is nie altyd ʼn doelbewuste en vooraf beplande keuse waarmee ek die Here eenkant toe skuif nie.  Adam en Eva se besluit om van die boom van kennis te eet het heel moontlik nie voorsien dat hulle daardeur van God vervreem sal raak nie. Tog gebeur dit onmiddellik. Hulle word uit die paradys verdryf.

Ander kere verloop daar ʼn langer tydperk voordat ons besef dat ons optrede God op die agtergrond skuif.  In 1 Sam 1:3 ontmoet ons die priester Eli en sy twee seuns Hofni en Pinehas wat in Silo diens doen.  Die kinderlose Hanna pleit by Eli dat haar gebede verhoor sal word en na Samuel se geboorte dien hy die Here onder Eli se toesig. Maar Eli se twee seuns was slegte mense en het nie met die Here rekening gehou nie.  Hulle sondig deur van die offervleis te eet en by die vrouens wat by die ingang van die tent diens doen te slaap. Hulle maak geen geheim daarvan dat hulle die Here minag nie.

Eli was al baie oud en berispe sy seuns oor die dinge waarvan hy aanhoudend by die hele volk moet hoor.  Die gerugte wat hy hoor is nie goed nie want hulle verlei die volk van die Here.  Eli vermaan hulle om die saak reg te stel.  Deur sy seuns aanvanklik te laat begaan om op hul sondige pad te volhard, sou beteken dat hy hul optrede goedkeur. God sal in hierdie geval as Regter optree. Hulle ongehoorsaamheid word met die dood gestraf.  In skrille kontras hiermee hoor ons dat Samuel grootgeword het en dat die Here en die mense hom goedgesind was. 

Uit die uiteenlopende optrede van Eli se seuns teenoor die van Samuel besef ons wat ʼn leefwyse naby die Here behels.  Ons raak ook soms uitgeput en bly nie altyd waaksaam en opreg in ons lewe en optrede nie.  Eers nadat Eli aanhoudend by die volk oor ʼn lang tydperk van sy seuns se optrede hoor, vermaan hy hulle. 

Dit is deel van die Satan se slinkse werkswyse om ons steselmatig van die Here te laat wegdraai.

Dit is God se genade om ons deur die Heilige Gees gehoorsaam te maak.  Eli se seuns eien hul die offervleis vir hul eie gebruik toe.  Hulle verkeer sedeloos met die vrouens wat diens doen by die tent. Dit is optrede wat deur selfsug aangevuur word.  Eli tree nie ferm op nie en wanneer die Here die saak uitmaak sterf sy seuns. 

Dié gebeure is ʼn wekroep dat ons nooit sal uitstel wanneer ons God se opdragte hoor nie.  Ons hele lewe is in ons Here se diens.  God verwag dat ons Hom met woord en daad sal dien. In die Nuwe Testament leer Christus ons om te waak teen die aanvalle van die Satan wat soos ʼn brullende leeu rondgaan om ons te verskeur.  Met sy kruisdood het Hy alles oorwin en aan my lewe gegee. 

Moenie uitstel nie.  Moenie onreg toelaat nie.  Maak vandag werk daarvan om jou lewe reg te skuif!

Dors vir meer:

1 Pt 5:8 -11

Gebed

Here, skenk aan my die wysheid en krag om nie altyd uit te stel nie. Leer my om U doel met my lewe raak te sien.  Dankie vir U oneindige liefde. Amen

Ds Petrus van Blerk

GK Rietvallei

0824560235

Skriflesing: Gen 3:1-:24                                     Teks wat tref: v 9,10     

Navorsing dui daarop dat die gemiddelde mens daagliks ongeveer 35 000 besluite neem. Die meeste hiervan geskied onbewustelik. Dan is daar besluite met bepaalde gevolge.  Wat sal ek vandag aantrek? Hoe laat gaan ek opstaan? Ma, wat eet ons vanaand? Is hierdie my trou man? Elke besluit het ʼn oorsaak. Elke besluit het ʼn gevolg. Party keer wil ek my hare uit my kop trek. Ander kere is ek trots as my besluit gehelp het dat ek bevordering gekry het. 

God het die mens geskape om binne ʼn bepaalde verhouding te lewe.  In Genesis 1 lees ons dat die mens vir God kosbaar is en dat Hy my oneindig liefhet.  Hy laat Adam en Eva in die paradys lewe. Daar heers volkome harmonie. God gee aan die mens oorvloed.

Kort daarna lees ons van die sondeval wat hierdie verhouding skaad.  Ten spyte van God se duidelike opdrag om nie van die boom van alle kennis  (Gen 2:16) te eet nie, skuif die mens God uit hul lewe met ʼn doelbewuste keuse wat hul uitoefen. Op slinkse wyse oorreed die slang hulle om ongehoorsaam te wees. Die mens verskuif die grense wat God in sy wysheid vasgelê het. Die mens wil soos God word wat alles ken.

Daar word baie vinnig verskonings aangebied toe God vir Adam en Eva konfronteer..  Getrou aan die mens se aard om onsself te verontskuldig of om ander vir die neem van swak besluite te blameer, is hul met antwoorde gereed toe die Here na hul roep.  Daarom plaas ek die skuld baie maklik op iemand anders. Ons het oorgenoeg redes waarmee ons onsself uit elke oortreding loswikkel. Eers word die slang blameer. Dan beskuldig ons mekaar.  My omstandighede regverdig mos my optrede. Dit was in  ʼn oomblik van swakheid dat ek geld verduister het of slegte tydsberekening toe ek betrap is terwyl ek ontrou was.  Met ons optrede, woorde, gebare en gedagtes skuif mense die Here weg. 

Genadiglik ontvang ek ʼn tweede kans.  God los die mens nie alleen nie.  Hy roep na hulle. Al voel ek soms kaal en wil ek as gevolg van omstandighede gaan wegkruip, straf die Here die mens maar gee Hy weer uitkoms.  Hy gee vir Adam en Eva velklere om hul naaktheid te bedek. Aan die kruis gee Christus sy lewe om ons sonde te bedek en ons verhouding met God te herstel. Met groot eerbied gesê lei die Heilige Gees ons om vir die Here op te skuif en aan Hom die eer te gee. 

As die Here vir jou vra: “Waar is jy?” moet jy gereed wees om in gehoorsaamheid op te skuif!

Dors vir meer:

Psalm 36

Gebed

Here, dankie dat ek U roepstem kan hoor.  Bewaar my hart van elke bose plan.  Stel my hande en voete in U diens.  Ek bely dat alles aan U behoort. Elke sekonde van my bestaan is deur Christus se verlossingswerk aan my gegee.  Amen

Ds Petrus van Blerk

GK Rietvallei

0824560235

Skriflesing: Gen 1:26-31                    Teks wat tref: v26,31    

In die begin het God die hemel en die aarde geskep. Aan die einde van elke dag beoordeel God die werk van sy hande en bevind dit goed. Op die sesde dag word die mens deur God geskape en toe Hy na alles kyk wat Hy gemaak het, was dit baie goed. Op noukeurige wyse word alles in harmonie geplaas en geskied alles volgens God se wil. Die mens kry ʼn prominente plek in hierdie skepping as verteenwoordiger van God. Terwyl die aarde en alles aan die Here behoort kry die mens opdrag om vrugbaar te wees, die aarde te bewoon en dit te bewerk.

Deur opnuut na die Here se opdragte in Gen 1: 26-28 te luister besef ek my posisie weer. Alles begin by God en alles is vir God.  Ek is baie kosbaar vir God. Ek leef in ʼn besondere verhouding met Hom. Ek ontvang sy bewaring en beskerming.  Ek ontvang die mag om oor God se handewerk te heers. Ek is God se verteenwoordiger.  Ek ontvang daarmee ʼn sekere posisie.  Ek ontvang die mag om soos ʼn koning op te tree.  God ag die mens  so hoog dat Hy sy skepping aan ons toevertrou. 

In Ef 1:21 word verkondig dat God alles aan Christus onderwerp het en Hom bo alles verhef het.  Dit beteken dat daar nêrens eens die geringste plekkie is waar ons sonder God is nie.  Ons Here se heerskappy geld vir my hele lewe. Elke asemteug. Elke lewenstreë. Elke besluit. Ja daar is nie ʼn enkele vierkante sentimeter waar ek God buite rekening kan laat nie. Tog sien ons dat die mens God dikwels eenkant skuif.  Ons maak God deel van my Sondagprogram en ʼn paar geleenthede waar ek Bybelstudie doen of bid.  En vir die res van die tyd is God nie deel van my besigheid, huwelik, opvoeding van my kinders of sosiale geleenthede nie.  Ons probeer God beperk en selfs uitskuif sodat ek my lewe kan leef en bepaal.

Sedert die sondeval skuif die mens God uit. Die gevolge hiervan is duidelik sigbaar.  Ons leef asof die Here nie Here van alles is nie.  Ek wil my lot bepaal en ek sal besluit hoe ek leef. Ons ongehoorsaamheid is oral sigbaar.  In huwelike waar daar geen respek meer is nie. By die huis waar kinders se opvoeding agterweë bly. By die werk as daar geen etiese waardes geld nie.

In die Bybel is talle voorbeelde hiervan – Adam en Eva wat vir God lieg,  die volk wat ʼn goue kalf bou en Eli se seuns wat die voorskrifte oor offers oortree is maar enkeles. Mag die Heilige Gees ons met die volgende aantal dagstukkies lei om raak te sien waar ons besig is om God nie te eer nie.  God het jou as die kroon van sy skepping gemaak. Ondersoek jou lewe en kyk waar jy moet opskuif!

Dors vir meer:

Ps 24 en Fil 2:5-11

Gebed

Here, leer my om U altyd te eer. Laat ek raaksien waar U regeer. Lei my deur U Heilige Gees om  raak te sien waar ek moet skuif sodat u die eer ontvang. Amen

Ds Petrus van Blerk

GK Rietvallei

0824560235

Jesaja 52:13-53:12
Teks wat tref: Jesaja 53:12.
Hierdie gedeelte gaan oor die vernedering en verhoging van die Kneg van die Here.
Hierdie is vir ons ʼn wonderlike samevatting van die Evangelie! Hoeveel van hierdie gedeelte kom nie na vore oor wat ons van Jesus Christus bely in die Twaalf Artikels nie?

Luister opnuut na die verskriklike lyding wat Jesus Christus moes deurmaak- die lyding wat vir ons die bevryding bring.
“ Hy was verag en deur die mense verstoot, ‘n man van lyding wat pyn geken het,
iemand vir wie die mense die gesig wegdraai. Hy was verag, ons het hom nie gereken nie. Tog het hy óns lyding op hom geneem, óns siektes het hy gedra. Maar ons het hom beskou as een wat gestraf word, wat deur God geslaan en gepynig word. Oor óns oortredings is hy deurboor,
oor óns sondes is hy verbrysel; die straf wat vir ons vrede moes bring, was op hom,
deur sý wonde het daar vir ons genesing gekom.

Christus moes dit alles deurmaak om aan ons die lewe te gee. Maar na die vernedering volg die verheerliking!
Ná sy bitter lyding sal hy weer die lig sien en hy sal die Here ken.
My dienaar, die regverdige, sal baie mense regverdig maak: hy sal die straf vir hulle sonde dra.
Daarom gee Ek hom ‘n ereplek onder die grotes. Hy sal saam met magtiges die oorwinning vier
omdat hy hom in die dood oorgegee het en as misdadiger beskou is,
omdat hy die sondes van baie op hom geneem het en vir oortreders gebid het.”

Hoe raak hierdie gedeelte jou? As ons hierdie lees, dan kan ons nie meer soos skape ronddwaal nie, maar besef wonderbaarlik die genade dat ons sonde op Jesus neergekom het. Dit is betaal!
Lees dit soos die Etiopiër wat in Handelinge 8 (32-39) hierdie gedeelte gelees het en Filippus vir hom die gedeelte verklaar het en hy gedoop is.
Verstaan dat die vernedering in jou plek was. Verstaan verder dat ook die verhoging in jou plek is.
Ons is aan Jesus verbind! Waar Hy is, sal ons wees! Sit jou reis met blydskap voort

Dors vir meer:
Handelinge 8:26-40 en Hebreërs 2.

Gebed
Dankie Here dat U die verskriklike lyding wat ons toekom, op U Seun Jesus Christus geneem het en ons laat deel in U heerlikheid. Aan U behoort die mag en majesteit en heerlikheid van alle ewigheid af tot in alle ewigheid. Amen.

Ds Danie Potgieter
072 272 9631
GK Rietvallei

Jesaja 52:1-11
Teks wat tref: Jesaja 52:7.
Hoe wonderlik klink op die berge
die voetstappe van hom wat die goeie boodskap bring,
wat vrede aankondig, wat die goeie tyding bring,
wat redding aankondig,
wat vir Sion sê: “Jou God is Koning!”

Die Bybel is ’n boek met goeie nuus – dit is wat die woord evangelie beteken: ʼn blye boodskap!”
Hierdie tweede gedeelte van die boek Jesja bring dan die wonderlike troos boodskap. Die goeie nuus van die Here Jesus Christus, van wie Hy is en van wat Hy gedoen het en wat dit alles vir ons beteken.

Die goeie nuus wat vir die Here se volk in Jesaja 52 gebring is, is dat hulle uit die Babiloniese ballingskap bevry gaan word. Hulle kan terugkeer want hulle verhouding met die Here is herstel. Die Here het in die verlede met groot mag opgetree en Hy gaan dit weer doen. Hierdie is ook ’n voorspel van die groot blye boodskap wat vir die hele wêreld bedoel is: dat Jesus Christus mense uit die ballingskap van sonde en dood bevry.
Hoe wonderlik is hierdie boodskap nie vir ons nie! ʼn Boodskap van vrede, goeie tyding en redding! Beleef ons nog hierdie boodskap as die goeie nuus? Is dit vir ons die enigste troos in lewe en in sterwe?
Dit is vir ons ’n boodskap van vrede wat ons verseker dat die Here nie meer vir kwaad is vir ons nie, dat die verhouding tussen Hom en ons herstel is. ʼn Boodskap van verlossing/redding want ons is waarlik verlos en vrygemaak van die ellende van die Here se toorn en straf wat ons sondes oor ons gebring.

Hoor weer opnuut die boodskap: “ Die goeie, die vrede, die redding – dis hier, Jerusalem! Wees bly!”

Wees bly omdat die verlossing van Christus nie maar net sommer gebeur het nie- Christus het met sy lewe daarvoor betaal! Wees bly want dit is nie maar net sommer so dat jy die boodskap hoor nie – die Here het jou spesiaal uitverkies en jou na Hom gebring deur die kragtige werking van die Heilige Gees.
Wees bly in elke aspek van jou lewe want die boodskap van vrede is vir jou gegee! Leef dit veral ook uit hoe ons hierdie boodskap aan ander bring: “Jou God is Koning!”.

Dors vir meer:
Galasiërs 1:1-10 en Romeine 10.

Gebed
Here ons God en Koning! Ons kan U nooit genoeg dank vir die wonderlike blye boodskap dat ons sondes vergewe is nie. Lei ons deur U gees om elke dag hierdie boodskap uit te leef en te verkondig. Amen.

Ds Danie Potgieter
072 272 9631
GK Rietvallei.

Jesaja 51
Teks wat tref: Jesaja 51:7-8

Hoeveel mense is daar om ons wat werklik in die Here glo? Hoeveel glo werklik dat die Here die skepper is van die hemel en aarde? Hoeveel leef volgens die gebooie van die Here en doen wat reg is? Voel dit asof jy deel is van die minderheid vandag?
Moet dan nie moedeloos word nie. “Luister julle wat doen wat reg is, volk in wie se hart my wet is, moenie bang wees vir die spot van mense nie; moenie skrik as hulle jou beledig nie”. Meer en meer loop ons deur onder die gespot van mense. As jy vir die 3de keer gaan vir jou bestuurlisensie, dan vra ander maar hoekom koop jy nie net dit nie. Hoekom wag julle nog om te trou, bly net saam. So kan die lys van spot nog baie langer wees- maar moenie skrik nie!
Hulle vergaan soos klere wat deur motte opgeëet word. Hoeveel van die persone wat jou gespot het oor jou geloof is nog in jou lewe?

Maar die verlossing en die redding wat die Here bring is vir altyd. Nie net is ons redding vas en seker nie, dit is ook van geslag tot geslag. So het die gehoorsaamheid wat jy vandag beoefen in jou geloof, ʼn uitwerking op die pad vorentoe. Die huwelik wat jy nou aan werk, help nie net jou en jou lewensmaat nie, maar ook jou kinders en hulle kinders.
Deur die genade van die Here en die kragtige werking van die Heilige Gees kan ons nou soekers wees na die wil van die Here en geregtigheid najaag (vers 1). Alles net omdat daar vir ons ʼn ewige redding en verlossing is deur Jesus Christus.
Die Here bring ʼn ewige redding, wat daar is ver elke geslag. Aan wie gaan ons dan gehoorsaam wees? Die mense en wêreldstrome wat daar nou in jou lewe is en rondom jou is wat maklik vergaan? Of die Here wat vir altyd dieselfde is?

Dors vir meer:
Handelinge 4:1-21 en Titus 3:1-11.

Gebed
Here, U wat die Almagtige is. Dankie dat U vir ons ʼn ewige redding gee! Lei ons om nie moedeloos te word as ons op die wêreld fokus, maar opnuut altyd op U alleen fokus. Dankie dat ons vir ewig kan weet dat U regeer! Amen.

Ds Danie Potgieter
072 272 9631
GK Rietvallei.

Jesaja 50
Teks wat tref: Jesaja 50:6
Die Kneg het ‘n geoefende tong en geopende oor van die Here ontvang, sodat Hy kan weet hoe om mense wat moeg is moed in te praat. Hy praat ons moed in deur te wys op sy eie onderwerping. Hy onderwerp Hom in ons plek aan swaarkry. “Ek het nie agteruitgewyk nie. Ek het my rug gegee vir die wat slaan, en my wange vir die wat die hare uitpluk; my aangesig het Ek nie verberg vir smaadhede en bespuwing nie”.
Christengelowige, watter omstandighede jou ook al moeg maak, Jesus is die Christus (Messias) wat hier deur Jesaja aan die woord gestel word. Luister na Hom in jou smart, jou vertwyfling, jou stoflik én geestelike nood: “Wie is daar onder julle wat die Here vrees, wat na die stem van sy Kneg luister, wat in duisternisse wandel en geen ligstraal sien nie? – laat hy vertrou op die Naam van die Here en steun op sy God!”
Die kruis by Golgota kom nie uit die niet te voorskyn nie, dit word geprofeteer deur die Kneg van die Here en dit word vervul deur Jesus Christus. Dit word geglo deur God se kinders wanneer hulle moed skep en God prys!

(Geneem uit GKSA Almanak 2002, Ds FJ du T Lessing).

Dors vir meer:
Johannes 12:12-36 en Psalm 139
Gebed
Here, dankie dat U, U Seun Jesus Christus gestuur het as U dienskneg. Mag ons altyd na U stem luister en leef in die Lig!. Amen.
Ds Danie Potgieter
072 272 9631
GK Rietvallei.

Jesaja 49

Teks wat tref: Jesaja 49:15-16.

Hoofstuk 49 begin met die “dienaar” van die Here wat aan die woord is.  Hy vertel alles wat die Here belowe het en deur hom gaan verrig.  Wat veral hier uitstaan is dat die Here jou roep nog voor jou geboorte, nog voordat jy gevorm is in die moederskoot.

Hierdie uitspraak oor die dienaar van die Here gaan nie net oor Juda wat die Here gaan gebruik om ʼn lig vir die nasies te wees nie- dit wys direk na die Messias- Jesus Christus.  Die woorde het regstreeks op Hom betrekking en vind in Hom vervulling. Hy wat vir ons die perfekte voorbeeld is van die Dienaar/Kneg van die Here. Jesus Christus se roeping en taak is bevestig toe Hy nog in die moederskoot van Maria was, nog voor sy geboorte is dit aangekondig.

Vanaf vers 2 kry ons dan die roeping en taak wat Christus kom vervul het- “Hy het my mond soos ‘n skerp swaard gemaak… Hy het vir my gesê: Jy is my dienaar, jy is Israel, deur jou maak Ek my mag bekend.” So het God deur Christus sy mag bekend gemaak, almal opgeroep om Hom te verheerlik.  Daarom gaan konings en leiers voor Hom buig.  Reeds nou vind dit al plaas, maar met Christus se wederkoms gaan almal voor God buig. 

Israel het hierdie opdrag gehad om as lig vir die nasies te lewe!  Hulle moes heilig lewe en getuig van God se groot mag, maar baie kere het hul dit nie gedoen nie.  Jesus Christus is dan nou Israel- die lig vir al die nasies.

Hierin vind ons dan die besonderse troos in Jesaja 49.  Christus het aan die kruis uitgeroep

 “Die Here het my verlaat” sodat ons nooit verlaat sal word nie.

Die fokus verse gee vir ons drie keer hierdie versekering: “Kan ‘n vrou haar eie baba vergeet,

haar nie ontferm oor die kind wat sy in die wêreld gebring het nie?

Selfs al sou so iets kon gebeur, Ek sal jou nie vergeet nie. Ek het jou naam in my handpalms gegraveer, Ek sien jou mure altyd voor my.”

Selfs al sal ʼn moeder haar kind vergeet- die Here is getrou en sal jou nooit vergeet nie.

Die Here het ons in sy handpalms gegraveer! In alles wat Hy doen, dink Hy aan ons!

Dors vir meer:

Haggai 2 en Psalm 48.

Gebed

Here, dankie dat U, U Seun Jesus Christus gestuur het as U dienskneg sodat ons nooit deur ʼn verlaat word nie. Dankie dat ons hierdie week kan ingaan met hierdie troos en U kan verheerlik en U naam groot maak. Amen.

Ds Danie Potgieter

072 272 9631

GK Rietvallei.

Skriflesing: Rm 11:33 -12:8    Teks wat tref: Rm 12:1

Die eerste 11 hoofstukke van Romeine beskryf  ʼn verhoor wat afspeel waarin Paulus ons leer dat almal vandag soortgelyke omstandighede beleef.  Die mens se sondeskuld word beskrywe. Deur Christus kom daar verlossing. Aan die einde van Hoofstuk 11 kyk hy terug en oorweldig God se goedheid en onnaspeurlike weë hom. Dit beteken dat alles wat ek het van God af kom.  Daar is geen grense vir God se liefde en genade nie. God is die rede vir ons bestaan. Hy eindig met ʼn lofprysing.

Daarna doen hy ʼn beroep op ons. In die lig van God se groot ontferming volg die opdrag om ons as lewende en heilige offers aan God te gee.  Dit beteken dat my hele lewe ʼn bewys daarvan is dat Christus die fondament van alles is.  Omdat Christus my so liefhet dat Hy sy lewe vir my afgelê het, wil Hy dat ek gehoorsaam aan God sal lewe. God gee opdragte en beginsels vir ons lewenspraktyk as kinders van God.

Hiervoor is daar ʼn verandering nodig. Dit is ʼn verandering wat net God teweeg kan bring. Dit is ʼn  totale gedaanteverwisseling. Nie net ons denke word verander nie maar ook ons gesindheid. Ons dink hier aan die larwe wat in ʼn skoenlapper verander.

Om jouself vir Hom te offer is wat God van jou vra. Ek moet aktief my lewe en optrede so inrig en verander dat ek alles vir die Here opsy sit.  Heilig beteken dat ek myself aan die Here alleen verbind.  Ek doen afstand van alles wat vir my belangrik was, en gee my hele lewe aan die Here. Dink aan die dinge en plekke waar jy jou tyd bestee. Dit is so maklik om op te offer vir my stokperdjie, of vir die klub waaraan ek behoort, of tyd saam met mense wat soos ek dink en voel. Nou moet alles diensbaar aan God gestel word.

Dit beteken nie dat ek nou skielik ʼn klooster bestaan moet voer nie. Inteendeel, dit beteken dat ek vir God lewe. Met die beeld van die liggaam word dit so treffend beskryf. ʼn Liggaam kan net lewe as daar harmonie en samewerking van al die ledemate is. In Christus is ons een liggaam maar almal ook afsonderlik lede van mekaar. Dit is God se bedoeling dat ons aan mekaar diensbaar sal wees. Dit is die betekenis van offer. Dan is ek besig om net God se wil te doen.

Dit alles begin met my denke waarna my liggaam uitvoering gee om my lewenswyse en gedrag te bepaal. Nie net ons denke word verander nie maar ook ons gesindheid. Ek leef blymoedig en toegewyd.

Met Christus se offer aan die kruis, het my lewe radikaal verander. Gee jouself aan God as lewende en heilige offer.

Dors vir meer:

1 Kor 12 en Jes 6:1-8

Gebed

Here, dankie vir U groot ontferming wat vir my redding bring.  Dankie dat U my verander het.  Maak my diensbaar. Amen

Ds Petrus van Blerk

GK Rietvallei

0824560235